Delhi, Rymphang 10
Hapoh ka jingïalam jong u Myntri Rangbahduh, Narendra Modi, haba pyntreikam ïa ka polisi ka bym ailad ïa u drok, ha u 2024, baroh ki kynhun jong ka aiñ ha kylleng ka ri, kynthup ka Narcotics Control Bureau (NCB), ki la ïoh kurup ïa ki jingdih pynbuaid ba shongdor kumba T. 25,330 klur, kaba palat 55% ka jingbun haba ïanujor bad u drok ba shongdor T.16,100 klur ba ïoh kurup ha u 2023.
Kane ka jingjop ka dei ka dak jong ka rukom treikam ‘Bottom to Top’ bad ‘Top to Bottom’ ba la sdang hapoh ka jingïalam jong u Myntri Rangbah-duh u Modi bad ka jing-ïalam jong u Myntri Kam Pohïing jong ka Sorkar Pdeng, Amit Shah. Ka Sorkar u Modi ka ïaid shaphrang sha ka rukom treikam ba kynthup baroh kawei ka Sorkar ban pynlong ïa ka India kaba lait na u drok.
Ha u 2024, ka jingïoh kurup ïa ki drok kiba kham buh jingma bad ba kham kyrni, cocaine, bad ki dawai ba pyndonkam kum ki jingdih pynbuaid ka la kiew bha, kiba kham rem dor shuh shuh.
Ha u 2024, ka jingdon u ATS (Amphetamine-Type Stimulants) kum Methamphetamine ka la long palat arshah na ka 34 quintal ha u 2023 sha ka 80 quintal ha u 2024. Kumjuh ka jingdon u cocaine ba la ïoh kurup ruh ka la kiew na ka 292 kilo ha u 2023 sha ka 1426 kilo ha u 2024. Ka jingdon u Mephedrone ba la ïoh kurup ka la kiew na ka 688 kilo ha u 2023 haba ïanujor bad 3391 kilo ha u 2024. Kumjuh, ka jingdon u Hashish ba la ïoh kurup ka la kiew na ka 34 Quintal ha u 2023 sha ka 61 Quintal ha u 2024. Ka jingdon ki dawai ba la pyndonkam bha kum ki jingdih pynbuaid ka la kiew na ka 1.84 klur sha ka 4.69 klur tylli (ki dawai kuli).
