Shillong, Rymphang 10
Ki Pulit ka East Khasi Hills ha ka Sngi U Blei ki la ïoh kem san ngut ki runar kiba rah ruh bad ka tiar siat, kaba dei ka pistol shna hi lem bad 4 tylli ki kuli. Ïa kine ki runar ki pulit ki la kem na ka thaiñ Mawsynram, kaba hap ha East Khasi Hills District.
Kine san ngut ki dei ba la tip kyrteng kum u Aidonsing Nongsiej (40) uba na New Nongstoiñ, West Khasi Hills, u Orally Khardewsaw (33) uba na Nongkhlaw, Nongstoiñ, West Khasi Hills, u Wanrilang Nongkynrih (33) uba na Mawlai Mawtawar, Shillong, u Mossingstar Nongbri (28) uba na Massar, Eastern West Khasi Hills bad u Pynshailang Puweiñ (30) uba dei na ka shnong Riangmaw, Shallang, West Khasi Hills.
U Superintendent of Police ka East Khasi Hills, Bah Vivek Syiem u la ïathuh ba hadien ba la ïoh jingtip kaba bniah, ka kynhun ki pulit Special Operation Team (SOT) ki la pynlong ïa ka jingtalasi kali ha ka thaiñ Mawsynram ha kaba ki la ïoh ban bat ar tylli ki kali ba la pyndonkam da u Pynshailang Puweiñ uba la shah thwet halor ka jingshah ujor shukor briew ha thanat Lumdiengjri.
U la ïathuh ba ha ka jingpynap shrip ki pulit la ïoh bat ïa kawei ka kali Swift bad kawei ka kali Celerio. Haba la talasi ïa ka kali ki pulit ki la lap ïa kawei ka pistol .22 ba la shna hi bad 4 tylli ki kuli kiba la kurup noh, la kurup ruh hynriew tylli ki mobile phone bad kiwei-kiwei ki kot ki sla.
Haba kylli, na ka liang u Bah Vivek u la ong ba katei ka kynhun ka dei beit tang ka kynhun jong ki runar.
Ïa kine ki runar ki pulit ki la pynngat mukotduma ha thanat Mawsynram hapoh ka Section 336(3)/3(5) BNS R/W Section 25(1A)(1B) jong ka Arms Act, bad ka jingtohkit ïa kitei ki briew ka la ïaid shakhmat halor ki kam runar ba ki la leh.
