New Delhi, Rymphang:
Kumba 80 ngut ki lehnoh Pakistan bad ki bor pahara, kynthup lang ia kito kiba dei na ki tnat bad kynhun wad bniah, ki la khlad hapdeng ka jingiakhun hapoh ka ‘Operation Herof Phase II”, katkum ka jingpynbna na ka tnat shipai Baloch Liberation Army (BLA) kaba la pyllait paidbah ha ka 31 tarik u Kyllalyngkot.
Ha ka kyrwoh khubor, ka BLA ka la kynnoh ba ki riew ïaleh jong ka ki la pynlong ïa ki jinghiar thma ba ïatylli ha kylleng ki district jong ka Balochistan, da kaba batai ïa kane ka jinghiar thma kum ka “Operation Herof Phase II.” Ka kynhun ka la kynnoh ba ki jingshah thombor ki la jia ha ka por kaba shi kynta bad ki la thmu ïa ki jaka pahara, ki jaka shipai, bad ki jaka synshar ha kiba bun ki shnong bad ki nongbah ha kylleng ka jylla. Katto katne ki video ha ki social media ki la pynshisha ia kine ki jingong.
Katkum ka kyrwoh kaba la pynshong nongrim ha u nongaiktien ka BLA u Jeeyand Baloch, la ong ba la pynlong ïa ki jinghiar thma ha ki phew tylli ki jaka ha Quetta bad sawdong jong ki, Noshki, Mastung, Dalbandin, Kalat, Kharan, Panjgur, Gwadar, Pasni, Turbat, Tump, Buleda, Mangochar, Lasbela, Kech. Ka kynhun ka la kam ba ki nongialehkai jong ka ki la thombor ha kajuh ka por ia kaei kaba ka la batai kum “ki jaka shipai, ki jaka synshar bad ki jaka pahara jong ki nongshun,” da kaba pynskhem ba ka la khanglad shipor ia ka jingleit jingwan jong ki bor pahara ha ki katto katne ki jaka.
Ka BLA ka la kynnoh ba 84 ngut ki briew kiba dei jong ki shipai Pakistan, ki pulit, ki tnad wad bniah, bad ki kynhun pyrshah lehnoh jong ka Pakistan ki la shah pyniap ha katei ka jingkhynra, ha kaba da ki phew ngut ki la mynsaw bad 18 ngut ki la shah rah mraw.
Ka la kynnoh shuh shuh ba palat 30 tylli ki jaka sorkar, kynthup ia ki ophis, ki bank bad ki phatok, la kurup ne pynjot, bad ba palat 20 tylli ki kali, la thang. Ka kyrwoh ka la ong ruh ba ki ehrang BLA ki la shimti ia ki katto katne ki post bad ki jaka buh ha ka por ba don ka jingialeh kaba jur bha.
Ym shym la don kano kano ka jingpynshisha kaba laitluid mardor ia kine ki jingkynnoh. Ki bor synshar jong ka Pakistan kim shym la pynmih, ha ka por ba ai khubor, ïa ka jubab kaba bniah kaba pynshisha ïa ka jingheh jong ki jingjia ba la batai. Ha ki mukotduma ba la dep kiba ïadei bad ki jingkynnoh jong ki lehnoh ha Balochistan, ki jingkheiñ jingdiah jong ki nongïap bad ki jingbatai shaphang ki jingjia bunsien ki ïapher bha na kiba la ai da ki kynhun lehnoh.
Ka kyrwoh jong ka BLA ka la kam ruh ba hynriew ngut ki shipai jong ka hi ki la shah pyniap ha katei ka jingkhynra, kynthup ïa ki dkhot jong kaei kaba ka la khot ka kynhun ba pawnam jong ka ka “Majeed Brigade.” Ka kynhun ka la pyni ïa ka jingïap jong ki kum shi bynta jong ka jingshah thombor ba ïatreilang ha ki jaka buh bor pahara bad ka la ong ba ki kam jong ki ki la ïarap ban pynskhem ïa ka jingsynshar shipor halor ki jaka ba la thmu.
