Kyiv, Rymphang:
Katkum ka jingwad bniah ba la pynmih ha ka Sngi Ba-ar da ka kynhun pyrkhat jong ka US, ka jinghiar thma ba shyrkhei jong ka Russia ïa ka Ukraine ka la wanrah ïa jan ar million ngut ki shipai kiba ïap, mynsaw ne jah rngai hapdeng ka jingiakhun thma jong kine ki ar tylli ki ri.
Ki shipai jong ka Russia ki la kit ia ka jingkit kaba khia jong ka jingduhnong, ha kaba ki la mad ia ka jingshah pyniap haduh 3,25,000 ngut na ka jingkheiñ ba ki don 1.2 million ngut kiba la shah pyniap naduh ba ki la hiar thma ia ka Ukraine ha kine ki saw snem, la lap da ka Centre for Strategic and International Studies (CSIS).
“Ym don ka bor bah kaba la mad jingeh ha kano kano ka jaka hajan kine ki jingkheiñ jong ki nongshah pynmynsaw ne jingïap ha kano kano ka thma naduh ka thma bah ba ar,” ong ka CSIS, da kaba kdew ba ki shipai Russia ki nang tlot bor bad kham suki ka jingleit tur sha ka madan thma.
Ki shipai jong ka Ukraine ruh ki la mad ïa ka jingduhnong kaba khraw kumba 5 lak haduh 6 lak ngut kiba la ïap hapdeng jong ka thma, ha kaba hapdeng 100,000 bad 140,000 ngut ki la ïap naduh u Rymphang 2022 haduh u Nohprah 2025.
“Lada kheiñ kyllum lang ia ki briew jong ka Russia bad Ukraine, ki lah ban long haduh 1.8 million ngut bad ki lah ban poi sha ka ar million ngut ki briew baroh ha ka por Tlang jong u snem 2026,” la ong ka CSIS.
Ha u Rymphang 2025, U President ka Ukraine, U Volodymyr Zelensky, u la ong ha kawei ka lad pathai khubor jong ka US ba ka ri jong u ka la duh haduh 46,000 ngut ki shipai naduh u snem 2022 — ka jingkhein kaba ki nongpeit bniah ki khein ba ka dei ka jingkhein kaba duna katba da ki phew hajar ngut kiwei pat ki la jah rngai ne la shah kem koidi.
Ka thma ka la shim ruh ia ka jingma kaba khraw ia ki riew paidbah, ha kaba ki nongpeitkai jong ka United Nations ki la buh jingthoh ia ka jingiap jong ki riew paidbah ha Ukraine ha u snem 2025 ban ia kiwei pat ki snem lait noh tang u snem 2022.
Palat 2,500 ngut ki riew paidbah ki la ïap bad palat 12,000 ngut ki la mynsaw ha u snem 2025, ong ka ophis jong u nongmihkhmat jong ka UN na ka bynta ka hok longbriew manbriew, da kaba kdew ba ka UN ka la pynshisha ba la jan 15,000 ngut ki riew paidbah ki la ïap naduh u snem 2022, hynrei ba ka jingkheiñ baroh “ka lah ban long kaba kham heh bha.”
