Washington, Rymphang:
Ki nongïakhih ki la ïalum lang ha ki jaka pdeng jong ki nongbah ha kylleng ka ri America ha ka sngi Saitjaiñ ha ki jingïalang ba ïatreilang bad ba suk ban pynsngewthuh shaphang ka jingkynnoh ba don ka jingshah thombor pyrshah ïa ki Hindu bad kiwei kiwei ki jaidbynriew rit paid ha Bangladesh. Ki nongpynïaid ki la ïathuh ba ïa ki jingïalang la pynlong ha palat 22 tylli ki nongbah, ha kaba kawei na ki jingïalang kaba bun eh ka long ha Artesia, ha kaba da ki spah ngut ki briew ki la ïalum lang na ka bynta ka jingïaid paidbah mynstep ban dawa ïa ka hok bad ka jingïada na ka bynta ki rit paid Hindu ha Bangladesh.
Ki nongiashim bynta ki la batai ia ka jingpyrshang kum ka jingkyrpad ia ka jinglong briew na ka bynta ka jingpyrkhat bad jingkitkhlieh jong ka pyrthei. Kiba bun ki bat ia ki placard kiba khot ia ka jingsuk bad jingiada ia ki rit paid, da kaba pyrta “Om Shanti”, ka kyntien Sanskrit kaba mut ka jingsuk ha ka pyrthei baroh kawei. Ki nongpynïaid ki la pynksan ba ki jingïalang ki long kiba ïahap bad ka aiñ, ki bym don jingïadei bad ka saiñ hima sima, bad kiba pynleit jingmut ha ka hok longbriew manbriew.
Ia kane ka jingialang Artesia la pyniaid da ki nongialam shnong ha ka thain ryngkat bad ka jingkyrshan na ki nongtrei mon sngewbha na ka thain.
Ki nongialam niam bad ki dkhot jong ki jaitbynriew Jiw bad kiwei kiwei ki jaitbynriew ki la wan ha ka jingiatylli, ong ki nongpyniaid.
“Kane ka dei halor ka jingpynthikna ba ka pyrthei kan pyrkhat ia ka jingjynjar jong ki jaidbynriew kiba rit paid,” la ong ka Geeta Sikand, ka nongmihkhmat jong ki lad pathai khubor jong ka Global Coalition na ka bynta ban iada ia ki Hindu ha Bangladesh, ha ka kyrwoh.
“Ngi pan ia ka jingiada, ka jingkitkhlieh, bad ka jingsuk,” ka la bynrap.
La iathuh ruh ba ki don ki jingialang paidbah ha ki nongbah ha kylleng ka thain Sepngi, Shatei Lam Mihngi, Midwest, bad Shathie Mihngi, kynthup ia ki jingialang hajan ki jaka pule jong ki skulbah kum ka Princeton University. Ha ki jaka kiba kham khriat, ki nongiashim bynta ki ieng shabar ha ki jingshit kiba hapoh zero degree ka jingdeit-thah, da kaba pynpaw ia kaei kaba ki la batai kum ka khubor jongki.
