Washington, Rymphang:
U Senator jong ka US, u Lindsey Graham ha ka Sngi Nyngkong, u la kam ba ka India ka la “kamai” ia ka jingpynhiar ia ki khajna katkum ka jingiateh khaii pateng kaba dang shu pynbna thymmai hapdeng ka India bad ka US, kaba pyniadei ia kane ka jingleh bad ka jingpynhiar ia ka jingthied umphniang jong ka Russia da ka New Delhi hapdeng ka thma kaba dang iaid ha Ukraine.
U Graham u la ïaroh ïa ka rukom treikam jong u President jong ka US Donald Trump, da kaba ai jingmut ba ka jingpynbor ha ka liang ka ioh ka kot ïa ki nongthied bor ding jong ka Russia ka la sdang ban ktah, da kaba kdew ïa ka jingïateh khaii pateng kaba dang shen bad ka India ha kaba ka Washington ka la pynduna ïa ka khajna ïa ka India sha ka 18%.
Une u heh u la kynnoh ba ka jingleh jong ka New Delhi ka la pynshisha ia ka jingpynhiar dor, da kaba ong ba kiwei pat ki jaitbynriew ruh kin “bud ia ka jingbthah jong ka India”.
“Lyngba ka jingleh jong ki, ka India ka la ïoh kham bun ïa kane ka jingpynhiar khajna. Nga kyrmen ba kiwei pat ki ri kiba heh kiba thied ïa ka umphniang Russia kin bud ïa ka jingbthah jong ka India,” bynrap biang u Graham.
Haba pyniadei ia ka rai khaii pateng bad ki jingthmu ba kham jylliew ha ka sain pyrthei, u Graham u la ong ba u President ka Russia u Vladimir Putin un wan tang ha ka miej jingiakren haba ka jingpynbor ka jur bha.
Kane ka jingkren jongu ka long hadien ba u Trump, kham mynshwa, u la ong ba ka US bad ka India “ki la mynjur ïa ka jingïateh kular khaii pateng” bad ka Washington ka la pynduna ïa ka khajna mar kylliang na ka 25 % sha ka 18 % “namar ka jingïalong paralok bad ka jingburom” ïa u PM Modi.
Ha ka jingkren jongu ha ka social media, u Trump u la kdew ia ka jingiakren jongu bad u PM Modi kham mynshwa ha kaba u la kdew ba u Myntri Rangbahduh ka ri u dei uwei na ki paralok ba jan tam jong u bad u nongialam ba donbor, uba don burom bha jong ka India.
U President ka US u la kam ruh ba u PM Modi u la mynjur ban “sangeh ban thied ia ka umphniang Russia” bad ban thied kham bun na ka US.
U la kdew shuh shuh ba ka India kan pynduna ïa ki khajna bad ki jingkhang bym dei khajna pyrshah ïa ka US.
“Ka la long ka burom ban ïakren bad u Myntri Rangbahduh jong ka Ri India, mynta ka step. U dei uwei na ki paralok ba khraw tam jong nga bad, u nongïalam ba donbor bad ba donburom jong ka ri jong u. Ngi la ïakren shaphang kiba bun kiei kiei, kynthup ïa ka khaii pateng bad ban pynkut noh ïa ka thma bad ka Russia bad ka Ukraine.
