Bengaluru, Lber:
Da kaba ailad ïa ka jingpynbor ba la pynmih da ki samla kiba ïakhih, ka kynhun myntri jong ka Karnataka ka la mynjur ban pyndap ïa ki 56,432 tylli ki kam ba lait ha ki tnad sorkar bapher bapher, da kaba bud ïa ka bhah kaba 50 percent ha ka jingpynrung kam. Ka jingtrei kan sdang hadien 30 sngi.
“Baroh ki dei ki kam ba la ai jingbit, ha kaba ka tnad pla tyngka ka la ai jingmynjur ban pyndap 24,300 tylli ki kam, bad 32,132 tylli ha ka thaiñ Kalyana Karnataka, katkum ka kyndon 371.
U Myntri Rangbah ka jylla u Siddaramaiah u la ai jingbthah ïa baroh ki tnad ba kin shim ïa ki lad ki lynti ban pyndap ïa ki kam,” ong u Myntri ka Law and Parliamentary Affair u HK Patil, haba pynshai ha ka jingïalang jong ka kynhun myntri.
Da kaba ka mat ka la nang kham khia, la ïakren ha ka kynhun myntri ïa ki jingktah kiba lah ban mih na ka jingpynslem ban thung kam.
Ka lah ban ktah biang ïa ka jingsynshar, ha kaba ka seng BJP kaba pyrshah kan pyni ba kan kyrshan ïa ki samla kiba ïakhih bad kan pynlong ïa ka kum ka mat kaba khraw, la ïathuh ki tyllong khubor.
Da kaba don ar tylli ki mukotduma hakhmat ka ïingbishar, kynthup ïa ka bhah hapoh ka ri na ka bynta ki Scheduled Castes, bad namar ba ka bhah kam lah ban palat ïa ka 50 percent, ka jingpynrung kam kan shong ha ka rai jong ka ïingbishar, u la pynshai.
U la ong ba da ka jingmynjur jong u Lat ka jylla u Thaawarchand Gehlot na ka bynta ka Scheduled Castes(Sub-Classification) Bill, ka aiñ jong ka bhah hapoh jong ki SC, yn pynrung ïa ka ha ka thungkam bad ban pule ha ka jingpynbna.
“Kan ym don kano kano ka jingkit kaba khia ha ka liang ka pisa tyngka namar ba ki kam, lait noh tang 1,000 tylli kiba dang shu thaw thymmai, ki dei kiba la don lypa kiba la hap thylli”, la ong u Patil haba jubab ïa ka jingkylli, da kaba bynrap ba ka sorkar kan shimkhia ïa ka kam pisa tyngka.
Ka kynhun myntri ka la pdiang ruh ïa ka kaiphod jong ka komiti ba kham halor ka Redressal of Regional Imbalance, ba la khlieh da u Prof M Govinda Rao kaba la ai jingmut ban mang pisa haduh 43,914 klur tyngka. Yn pdiang ïa ka ha ka mang tyngka, la ong u Patil.
Ka kynhun myntri ka la ïakren halor ka ‘Karnataka Freedom of Choice in Marriage and Prevention and Prohibition of Crimes in the Name of Honour and Tradition Bill, 2026’ kaba la tip kum ka ‘Eva Nammava Eva Nammava’ Bill, 2026, hynrei ka la pan jingmut na ka tnad kam pohïing shwa ban wanrah ïa ka rai ba khatduh ha ka jingïalang jong ka kynhun myntri.
