New Delhi, Rymphang:
U Arvind Kejriwal, uba dei u Myntri Rangbah barim, u la ïathuh ba la rah ïa u na la ïing bad la set ïa u ha phatok. Kata kam shym la ktah ïa u.
Ka la jan don ar snem hadien kane, u la pait ka dohnud bad ïam haba ka ïingbishar ka la sait khuid ïa u halor ki jingshah kynnoh donkti ha ka kam klop kaba la mih na ka jingdie kyiad ha Delhi. Hadien haduh ar snem, u la jaw ummat haba ka ïingbishar ka la pyllait ïa u na baroh ki jingshah kynnoh ha ka mukotduma jong ka polisi kyiad ha Delhi.
“Ban pynduh pyndam ïa ka seng AAP, la set phatok ïa san ngut ki hehduh nongïalam jong ka. Wat ïa u Myntri Rangbah uba don ha ka shuki, kaei kaei kaba ym pat ju ïohi mynno mynno ruh ha ka histori jong ka ri India, la tan noh ïa u na ïing jong u bad la set phatok ïa u haduh hynriew bnai. Ïa u Symbud Myntri jong ngi, u Manish Sisodia, la set phatok haduh ar snem. Ka mukotduma ka dei kaba la shna thok pura sha,” la ong u Kejriwal ha ka jingïakren bad ki nongthoh khubor.
