New Delhi, ïaïong:
U Srinivas Louis, uba la shah kynnoh ba u la phah da ki spah tylli ki jingbyrngem pynbthei bom sha ki ïingbishar ha kylleng ka ri India, u la pynpaw ïa ka kyrteng jong ki arngut ki briew kiba la kynnoh ba ki la ïarap ïa u ban nang kumno ban pyndep bad ban pynurlong ïa ki jingbyrngem.
Ki tyllong khubor pulit ki la ïathuh ba baroh arngut ki briew la ngeit ba ki dei ki nongshong shnong jong ka Mysuru.
“Ïa kine ki ar tylli ki kyrteng la pynshisha da ka kynhun. U la kam ba kine ki arngut ki la ïarap ïa u ha kaba shna ïa ki email bad pynkhreh ïa ki jingthoh jong ki,” la bynrap shuh shuh ki tyllong khubor.
Ha ka jingtohkit jong ki pulit, u Louis u la kam ba u don ka jingïakynad jaka kaba la slem bha bad uwei u bahaïing hasem ha Mysuru bad ba ka longïing jong u kam ïoh ïa ka bhah kaba dei hok. Hadien ba u la iehnoh ïa ka jingpule Law, u la nang kham sngewsih bad u la sngew ba ym shym la pyndep ïa ka hok.
“U la kam ba ha kaba sdang u phah email da kaba kham duna ki jingbyrngem, bad hadien ba u la ïohi ba kine ki wanrah tang khyndiat ne kim shym la pynthut ei ei, u la nang pynjur sha ka jingpyndonkam ïa ki kyntien kum ‘ki kam pyntriem jong ki lehnoh’ bad ‘ki jingrahbor’ kum shi bynta ban nang pynjur ki jingpyntieng pynsyier,” la bynra ka tyllong khubor.
Ki nongtohkit ki dang bishar bniah la u Louis u la pyndonkam palat 50 tylli ki email ID bad rung sha ka dark web ban buhrieh ïa ka jinglong jong u katba u dang phah ïa ki jingbyrngem ha kylleng ka ri.
La ïathuh ba bun na kitei ki email, ki dei kiba la phah beit beit na ka mobile phone jong u.
U Louis uba la 47 snem ka rta na Mysuru ha Karnataka u la shahkem ha ki pulit ka nongbah Delhi halor ka jingkynnoh ba u la phah palat 1000 tylli ki khubor byrngem thok sha ki jaka treikam ba kongsan ha kylleng ka ri India, ong ka tyllong khubor.
Une u la shah kem ha ka sngi Palei jong la taïew ba la lah na ka jaka sah ba u la ai wai ha ka por ba ki don ka jingkhynra lang kaba la don lang ki pulit ka Delhi bad ki kynhun pulit jong ka thaiñ, la ïathuh ki pulit.
Katkum ka jingïathuh jong ki heh sorkar, la thombor ïa ki katto katne ki jaka treikam ba pawnam, kynthup ïa ka Delhi High Court, ka Delhi Assembly, ki skul, bad ki ophis sorkar bapher bapher.
Kine ki jingbyrngem, kiba kham bunsien ki ïadei bad ki jingpyntieng pynbthei bom, ki la pynlong ïa ki jingpynkynriah jaka ïa ki briew bunsien bad ki jinglong jingman kiba shyrkhei bha ha kine ki khyndiat taïew ba la dep.
Hynrei hadien ki pulit ki la pynthikna ba baroh ki jingbyrngem ki dei kiba thok bad ki thmu ban pynmih jingtieng.
Ki bor pynïaid ki dang bteng ïa ka jingtohkit ban lap ïa ka daw jong kitei ki khubor thok kiba la ju pynmih biang biang.
Ki heh sorkar ki dang pyrshang ruh ban lap hato une u nongshah kynnoh u la leh marwei ne u la don ki paralok.
Ki pulit ki la kdew ba kum kine ki jingbyrngem thok ki pynthut ïa ka jingtreikam kaba man ka sngi bad ki buh ïa ka jingkit kaba khia ha ki kam kyrkieh bad ki kam pahara.
Ki heh sorkar ki la pynpaw ba ki khubor byrngem thok ki la nang jur ha kine ki bnai ba la dep.
Ha kaba sdang jong u bnai Lber, katto katne ki bank bad ki skul ha Delhi ki la ïoh ïa ki email kiba kum kine kiba byrngem pynbthei bom, kaba la pynlong ïa ki jingkhynra kiba jur bha.
Ha u bnai Rymphang, la thombor ruh ïa ki skul kiba bun ha ka nongbah, kaba la pynlong ïa ki ban ïarap kyrkieh.
Kum kine ki jingjia ki la don ruh ha kiwei pat ki nongbah.
Ha Mumbai, ka jingbyrngem bom ha St Xavier’s College ha Mahim ha kaba sdang jong une u bnai, ka la paw ba ka dei ka jingthok hadien ba la dep ban talasi bha.
Ki kynhun pulit, kynthup ïa ki kynhun wad bniah bad pynduh bom (BDDS), ki la shah pyntreikam ha kiba bun ki jaka.
Ki bor pynïaid ki la ïathuh ba la buh ïa ki lad jingïada kiba biang, bad la shim ïa ki sienjam katkum ki kyndon aiñ kiba donkam ha ki thanat pulit bapher bapher, la ïathuh ka tnad pathai khubor.
Hashwa, kata ha ka 8 tarik u Lber, kawei ka hospital ha Mumbai, ka la ïoh ruh ïa ka email ba byrngem pynbthei bom bom, kaba maham ïa ka “jingpynbthei LED”, kaba la pynmih ïa ka jingtieng hapdeng ki nongpang bad ki nongtrei.
Hadien kata ka BDDS ka la pynlong ïa ka jingjurip kaba bniah ïa katei ka jaka.
Ha ka jingjia kaba kum kane ha u bnai Lber, ki pulit ka Mumbai ki la pynlong ïa ka jingkhynra ha ka jaka jong ka Vidhan Bhavan hadien ba ka ïingdorbar thaw aiñ jong ka jylla ka la ïoh ïa ka jingbyrngem buh bom lyngba ka official website jong ka.
Katkum ki tyllong khubor ba paw, la ïoh pdiang ïa ka khubor byrngem shwa ban sdang ka jingïalang jong ka sngi ha ka por ba dang ïaid shakhmat ha ka jingïalang jong ka mang tyngka jong ka jylla.
Hadien katei ka jingpynbna, ki bor pahara ki la pynkhlaiñ bha ïa ka jingrung sha katei ka complex bad khang shipor ïa ka jingrung khnang ban pynsuk ïa ka jingtalasi kaba bniah.
Ki kynhun pulit ryngkat bad ki briew ka BDDS ki la scan ïa ka jaka baroh kawei kum ka lad jingïada.
