New Delhi, Nailur:
Ka kynhun National Investigation Agency (NIA) ka la shimti ïa ka jingtohkit halor ka jingbyrngem buh bad pynbthei bom kaba la byrngem ïa kawei ka liengsuiñ Air India Express na Dammam sha New Delhi ban pynkylla kyrkieh ïa ka lynti ïaid sha Ahmedabad ha ka 31 tarik u Nailar, ha kaba kawei ka Officer kynthei ka la paw kum ka “nongsuba ba kongsan” ha kaba la kynnoh ba ka la long ka nongbyrngem, ong ki tyllong khubor.
Kane ka heh ophisar, kaba la lap nyngkong ïa ka jingthoh ha ka kot shisla hapoh ka jaka leit bar, ka la shah weng shipor ïa ka kyrteng jong ka na ka thup jong ki nongtrei ka Airline naba ka jingtohkit ka dang ïai bteng, la ïathuh ka tyllong khubor.
Ka liengsuiñ Flight IX 170, kaba dei ka Airbus A320, ka kit ïa 32 ngut ki nongleit nongwan bad 8 ngut ki nongtrei ha ka por ba la pynkylla sha ka kad liengsuiñ jong ka Ahmadabad kum ka jingïada.
Katei ka liengsuiñ, kaba la kiew na King Fahd International Airport ha Dammam, ha ka por 10.28 baje mynstep, ha ka por jong ka ri, ka la hiar suk ha Ahmedabad, ha ka por 4.27 baje mynstep. Baroh ki nongleit nongwan bad ki nongtrei la pynlait noh da kaba suk.
Katkum ka jingong jong ki pulit jong ka Ahmadabad, la pyntip sha ka bor pynïaid liengsuiñ ha ka por kumba 3.40 baje eiei shaphang ka jingpynkylla lynti.
La ïathuh ba ka Ophisar ka la lap ïa ka kot shi sla ha ka jaka leit bar jong ka liengsuiñ kaba don ïa ka kyntien “BOMB” ryngkat bad ka dur kaba pyni ïa ka pla ha kaba la kynnoh ba la lap ïa ka.
Ha ka por ba jia katei ka jingjia, ki pulit ki la ong ba katei ka khubor ka thoh “BOMB RED 4:30.” Hadien kane la pynlong ïa ka jingkhynra kaba jur bha ïa kane ka liengsuiñ ha kaba la kynthup ïa ki kynhun wad bom, ki ksew smadien bad ka kynhun Central Industrial Security Force (CISF). Ym shym la lap ïa ki tiar kiba lah ban pynbthei ne kiwei kiwei ki tiar kiba suba wat haba la pynlong ïa ka jingkhynra kaba jur.
Hynrei ka jingtohkit ka la shim ïa ka lynti kaba thymmai hadien ba ka jingpeit bniah ïa ka jingthoh kti la ïathuh ba ka la pyni ïa ka jingïahap kaba khraw hapdeng ka jingthoh ha ka kot shisla bad ka jingthoh kti jong ka ophisar ba la shah tohkit.
Ki tyllong khubor ki la ïathuh ba ka jingbishar bniah ka la pyni ïa ka jingïahap kaba jan 65%, kaba la pynlong ïa ki nongtohkit ban bishar bniah ïa ka bynta jong u dkhot jong ka liengsuiñ ha katei ka jingjia.
Ka tyllong khubor ka la ong, “Ka NIA ka la shimti ïa ki jingtohkit halor kane ka jingjia mynta.” Ka NIA kam shym la kren eiei satia halor katei ka jingtohkit watla ka la pyrshang bunsien ban ïakynduh ïa katei ka tnad.
Ka kompeni liengsuiñ ka la pynthikna ba ki bor jong ka aiñ ki dang tohkit ïa kane ka kam hadien ka jingujor ba la ujor da ka kompeni kit liengsuiñ. “Ka kompeni liengsuiñ ka ïatreilang pura bad ki tnad ba dei peit,” la ong ka khubor.
Ka kompeni liengsuiñ ka la pynthikna ba ki bor jong ka aiñ ki dang tohkit ïa kane ka kam.
Ka kompeni kit liengsuiñ ka la bynrap ba ka “pynrem ïa kano kano ka jingleh kaba pynthut ne kaba don ka jingma ban pynthut ïa ka jingshngaiñ bad jingshngaiñ jong ki nongwan jngohkai, ki nongtrei bad ki jingtreikam jong ngi.”
