Beijing, Lber:
Ka China ha kane ka por ka la pynbna ia ka jingplie biang ia baroh ki khyrdop khappud naka bynta kiba na bar kiba kwah ban leit ban wan sha China bad kumta ruh la sdang ban plie biang ia ki ‘Visa’ naka bynta ki bar ri ba kin leit ban rung sha China hadien 3 snem ba ka China ka la khang khyrdep noh ia baroh ki khappud jong ka ri, kum shi bynta ban iada bad ban tehlakam ia ka jingpur bad jingsaphriang kulmar jong ka khlam Covid-19 hapoh ka ri.
Kane ka khubor ka long hadien ba ki bor pyniaid ka China ha u bnai ba la leit, ki la pynbna ia ka jingjop jong ka China pyrshah ia ka khlam Coronavirus bad kumta ruh namar ka jinghiar jong ka China ha kiba bun ki liang, la donkam ban plie bad pynkhie im biang noh ia ka ioh- ka kot bad ia ki liang ba bun ha kane ka kynti.
Ki don pat katto katne ki jaka hapoh China ki bym donkam ‘Visa’ bad ia kum kitei ki jait jaka, ka China ka la pynbna ba kin long ki jaka ki ban ioh rung ei khlem da donkam ban siew ne ban rah ia kano kano ka jait syrnod.
Kumjuh ruh ka tnat kam bar ri jong ka China ka la pynbna ba kito ki nongleit- nongwan ba nabar ka China bad kiba don ia ka ‘Visa’ kaba la ioh hashwa jong ka 28 tarik, Lber jong u snem 2020 bad kaba dang treikam, ki lah ban rah bad ban pyndonkam da katei hi kajuh ka ‘Visa’ ba kin ioh ban rung bad ban leit ban wan shapoh China.
Napdeng jong baroh ki ri kiba ka China ka la buh hapoh ka thup jong ki ri kiba la lah ban leit ban wan bad ban rung- ban mih sha China, ki katto katne tylli ki ri ki bym shym la don pat ha katei ka thup jong ki ri ba bun ki long ka Japan, South Korea, Australia bad ka United States.
La ong ruh ba hapoh jong u snem 2022 ba la leit, ki la don palat 115.7 million ki jingiakam khappud hapdeng ka China bad kiwei pat ki ri. Ha kaba 4.5 million ka dei ka jingleit rung jong kiba nabar shapoh ka China bad kaba tam ka dei ka jingmih jong ki nong China shabar jong ka ri.
Haba shim jingkheiñ kyllum, ka China ka la don kumba 670 million ki jingleit- jingwan hapoh u snem 2019 hashwa ka jingwan mih pyrthei jong u khñiang jingpang Covid-19. Ha kaba 97.7 million ki dei kiba nabar bad kiba leit ban rung shapoh China.
Dei ruh ha u Nohprah jong u snem 2022 ba la leit, ba ka China ka la phai dien noh na ka thong ‘Zero Covid Policy’ ba ka la buh thong naduh kaba sdang jong ka khlam Covid-19. Kumjuh ruh ha u Kyllalyngkot pat, ka China ka la weng noh ia ka jingpynshong pynkyrpang ia kito kiba wan poi nabar jong ka ri, ha kaba la ailad ia ki pat ba kin shu pyn kyrpang hi noh ialade hapoh ki jaka sah jongki hadien ka jingwan poi jongki shapoh ka ri.
Ki heh ka China ki la iathuh ruh ba ka la shim por tang kumba 2 bnai duna ia ka China ba kan pyniaid beit- pyniaid ryntih ia ki kam ki jam bad ia ka jinglong- jingman hapoh ka ri naduh ba la weng noh ia ki kyndon pyrkhing ba ju pyntreikam ha baroh shi katta ki snem.
