Islamabad, Lber:
Ha kawei ka jingjia la iathuh ba 2 ngut ki la khlad bad 7 ngut kiwei pat ki la mynsaw ha ka jingbthei hapoh Khuzdar jong ka Balochistan ha ka Sngi Ba-ar.
Katkum ka kaiphod na ki lad pathai khubor jong ka Pakistan, la iathuh ba katei ka jingbthei ka la jia ha ka surok Agha Sultan Ibrahim kaba don hapoh ka thaiñ Balochistan jong ka Khuzdar.
La ong ba katei ka jingjia ka long hadien ka jingbthei jong u bom Improvised Explosive Device (IED) ba la pyndait ha kawei ka kali kaba la leit ban pynpoi sha katei ka jaka.
U Myntri Rangbah ka Balochistan, u Abdul Quddus Bizenjo u la pynrem jur ia kito kiba don kti ha katei ka kam thombor bad u la ong ruh ba ki kynhun lehnoh ki dei kiba khawpud lada ki thombor ia ki riew paidbah bad ki mynsiem ba lui-lui jong ka ri bad u la kular ruh ba ka sorkar kan ym pyllait ia kito kiba don kti ha kum kitei ki kam thombor hynrei kan leh ia kaba donkam ha ka por kaba biang.
Kumjuh ruh ha u bnai ba la leit, uwei u nongñiah jong ka kali pulit bad u heh pulit jong ka distrik Khuzdar hi, ki la duh noh la ka jingim ha ka jing pynbthei bom ki lehnoh kiba don ha katei hi ka thaiñ.
Ha u Rymphang, ka la don kawei ka jingjia ha kaba 2 ngut ki heh pulit jong ka Frontier Corps ki la duh ei la ka jingim bad 3 ngut ki bor pahara ki la mynsaw ha ka jingbthei kaba la jia hapoh ka distrik Kohlu jong ka balochistan ha Pakistan.
Katei ka jingbthei ha katei ka por ka long ruh hajan ka kali jong ki kynhun pahara kiba dang ap pahara ha ka thaiñ Kahan jong ka distrik Kohlu.
Na ka liang ki heh nongialam jong ka Pakistan, ki la pynpaw ka jingsngewkhia halor ka jingjur jong ki kam thombor pyrshah ia ki riew paidbah bad kumta ruh ki la ong ba ki kynhun lehnoh jong ka ri, ki long kiba khawpud bad ki shu kwah ban pyni bor bad pyntieng pynsmiej ia ki riew paidbah ba lui-lui.
