Bogot, Lber:
U Lat jong ka Cundinamarca ha ka Sngi Palei, u la pyntip ba 11 ngut ki briew ki la khlad ha shen bad 10 ngut kiwei pat ki la mynsaw hadien ba ki la sahkut bad ngat ha ka jingbthei kaba la jia hapoh kawei ka par tih dewïong kaba don ha ki phang pdeng jong ka Colombia.
La ong ba ka daw jong katei ka jingbthei ha katei ka sngi, ka long namar ka jingkhlaiñ palat jong ka lyer ‘Gas’ kaba la kloi ban kem ia ka ding kaba sied na ka jaka treikam jong ki nongtrei shapoh jong katei ka par tih dewïong.
Kumta, la ong ba katei ka jingjia ka la jia ha ka miet jong ka Sngi Ba-ar bad kaba la ktah lang ia katto katne ki par tih dewïong kiba ia don ha kajuh ka laiñ.
Ki kynhun jong ka tnat pynlip ding ki la leit her mar-mar tang mar ia ioh jingtip shaphang katei ka jingbthei bad jingkem ding ha kaba ki la ioh ban pyllait im noh tang ia kitei ki shiphew ngut kiba la mynsaw bad kiba la ngat ha katei ka jingjia.
La ong ba kitei ki nongtrei ki la sahkut bad ki don ruh shapoh par kumba 900 metre lane 2,950 phut najrong ka khyndew, bad kumta kane ka la wanrah jingeh haduh katta ia ki kynhun iarap ba kin ngam bad leit sei ia kitei kiba mynsaw bad sahkut shapoh ñiamra hapdeng ka jingdum.
Namar la ong ruh ba katba nang ngam shapoh, katta ka nang duna ka lyer ‘Oxygen’ ban ring mynsiem.
Hynrei, la ong pat ba ka umphniang bad u dewïong, ki long u budlum jong ka khaïi- pateng ia ka Columbia ba kan ioh ban shalan shabar.
Ha u Nailar jong u snem ba la leit, ki tnat iarap ki la ioh ban sei bad pyllait im ia 9 ngut ki nongtrei dewïong hadien ba kawei na ki par tih dewïong be-aiñ jong katei ka thaiñ hi ka la twa bad julor noh.
Kumjuh ruh ha u snem 2021, katei ka ri, ka la mad haduh 148 tylli ki jingiap na kum kitei ki jingjia ha ka par tih dewïong na ka por sha ka por.
