Seoul, Lber:
Ka North Korea ha ka Sngi U Blei, ka la pynher ia u ‘namding ‘Short- Range Ballistic’ ha ka sien kaba saw hapoh ka shi taiew katba ka jingpynkilan jong ka South Korea bad United States ka dang iaid sha khmat.
La ong ba ka North Korea bad ka United States ki la kiar ban iatrei lang naduh ba ka North Korea ka la wanrah ia ki jingbyrngem- byrsit da ki kam Nuclear namar ka jingmaham jong ka United States halor ka jingpynher ‘namding (Nuclear Test) ba khah khah jongka.
Shuh shuh ruh la ong ba ka jingpynkilan jong ka United States bad ka South Korea ka la iaid hapdeng jong ki 11 sngi ha kaba la khot ia katei ka jing pynkilan kum ka ‘Freedom Shield’, bad ka long ruh ka jing pynkilan kaba heh bha hapoh jong kine ki 5 snem.
Kumta la ong ba ka North Korea ka la kynnoh ba katei ka jingiatrei lang jong ka US bad ka South Korea ha ka ban pynkilan bad ban ai jinghikai ia ki shipai jongki, ka long ka jingpynkhreh ban leit thombor ia ka North Korea bad kumta ruh ka North Korea ka la maham pyrshah ba kam don jingsalia ban pynphai kylliang lada kitei ki ri ki leh be-aiñ ne palat ia kaba ka North kam sngew iahap.
Ki heh ka tnat Joint Chiefs of Staff (JCS) jong ka South Korea, ha ka Sngi U Blei ki la iathuh ba ha ka por kumba 11 baje mynstep, ka North Korea ka la pynher ‘namding ‘Short-range’ ha ki thaiñ jong ka Tongchang-ri jong ka Pyongan Province sha ki bynta East jong ka duriaw. La iathuh ruh ba utei u ‘namding ha katei ka sngi, u la her palat ia ka 800 kilometres lane kumba 500 miles bad ha ka jingpeit thuh jong ka tnat wad bniah ka US bad South Korea, la ong ba katei ka jingleh jong ka North Korea ka long kaba be-aiñ bad kaba la pynkheiñ ia ki kyndon ‘Sanctions’ jong ka UN ba la buh.
Kumta ruh la ong ba ka tnat shipai jong ka South Korea ka long ba la pynkhreh halor kino kino ki jingma kiba ap na ka North Korea hapdeng ka jing iatrei lang jong ka South Korea bad ka US.
Kumjuh ruh ka tnat Info-Pacific Command jong ka US, ka la pynrem jur halor katei ka jingpynher ‘namding be-aiñ jong ka North Korea ha kaba ka la pyndonkam ia kitei ki tiar kiba la khang pyrshah ia ka bym bit ban pyndonkam.
La ong ruh ba ha ka Sngi Palei jong ka taiew ba lah lah, ka Pyongyang ka la pynher ia u ‘namding ba khlaiñ bor tam bad uba heh tam ia uba la ju khot da u ‘Intercontinental Ballistic Missile’ u Hwasong-17, ka long ruh ka sien kaba 2 ba kan leh ia kane hapoh jong une u snem 2023.
Kumta ruh la ong ba ka tnat Security Council jong ka United Nations ka lah ban pynlong jingialang ba kyrkieh halor katei ka jingpynher ‘namding be-aiñ ha ICBM ha kane ka por.
