Shillong, Nailur 19
Hadien ar taïew ba ka la rah ïa ka nam lahduh jong ka 133rd Durand Cup 2024, ka NorthEast United FC ha ka Sngi Palei ka la wanphai sha kane ka nongbah ban pyni paidbah ïa ki trophy bad ruh ban ai khublei ïa ka Sorkar Jylla kaba la ai jingkyrshan ïa kane ka klob bad ruh ba kan wan seng ïa ka shlem ai jinghikai phutbol ha Mawkhanu.
Ha kane ka jingwan sha kane ka nongbah, na ka liang u Myntri Rangbah ka Jylla u Conrad K Sangma ha ryngkat ki ophisar ka tnat ïalehkai ki la wan ban pdiang sngewbha bad ban ai khublei ïa kane ka kynhun kaba na ka thaiñ shatei lammihngi kaba la lah ban ïalehkai bha na ka bynta ban ïoh rah ïa ka nam lahduh ha ka sien kaba nyngkong ha ka Durand Cup mynta u snem.
Na ka liang u Myntri Rangbah u la khmih lynti ba kane ka kynhun kan dang lah ban ïalehkai bad ban nangkiew shaphrang ha ka kam ïalehkai jong ka Indian Super League bad kiwei ki lympung ïalehkai baheh jong ka ri.
U la khmih lynti ba kane ka jingïadei kaba jan bad ka North East United kan long ka jingïarap ïa ki rangïalehkai ka Jylla ba kin ïoh ka lad ban phong ïa ka jersey jong kane ka klob ha ki snem ki ban wan bad ruh ïa ka ri hi baroh kawei.
U Conrad u la pynpaw ba lyngba kane ka jingwan seng ïa ka shlem ai jinghikai phutbol kan long ka jingïarap ban nang kyntiew ïa ka phutbol ha Jylla.
