Tura, Nailur:
Ka ACHIK na Tura ha ka Sngi Balang ka la pynsngew sha u Myntri Rangbah ka Jylla, u Conrad K. Sangma halor ka jingsniew ki surok ha West Khasi Hills District.
Ka seng ha ka shithi sha u Myntri Rangbah ka la kyrpad ban maramot noh mardor ïa ka surok na Aradongga sha Mawkhrang kaba hap hapoh Rambrai-Jyrngam konstitwensi ha ka District.
Katto-katne ki jingeh ba kongsan kiba ki nongleit nongwan ki ïakynduh ki kynthup ïa kiba bun ki thliew ki syar, ka jingbym biang ka rukom pyntuid um, kumjuh ka pum-pum bad ka jingjaboh.
Katkum ka jingsngew jong ka seng, katei ka surok ka dei ka lynti kaba kongsan na bynta ki nongjngohkai pyrthei naba ka ïalam sha ka jaka bamkhana jong ka Mawkhrang. Hynrei namar ka jinglong-jingman ka surok, ki nongjngohkai pyrthei mynta ki shem jingeh, ha kawei ka liang kaba ktah pat ïa ka karkhana kam jngohkai pyrthei ha ka thaiñ.
Da kaba kdew ba ka jingbym lah ban maramot ïa katei ka surok kan ïalam sha ka jingduna ki nongjngohkai pyrthei sha katei ka thaiñ, ka seng ka la kyntu ba dei ban peit bniah noh kloi ïa katei ka kam.
