New Delhi, Risaw:
Ka India bad ka Germany ki la pynpaw ïa ka jingsngewkhia kaba jur halor ka jingïakynad kaba dang ïaid shakhmat ha Ukraine bad ka jingktah kaba jur ïa ka longbriew-manbriew.
U Myntri Rangbahduh ka ri u Narendra Modi bad u Chancellor Olaf Scholz ki la mynjur ba ka jingpyndonkam ne ka jingbyrngem ban pyndonkam ïa ki tiar Nuclear ha kane ka bynta ka long ka bym lah ban pdiang. Ki la pynrem ruh ïa ki kam pyntriem jong ki lehnoh bad ki kam thombor ba shyrkhei kiba har rukom. Ki nongïalam ki la ban jur ïa ka jingdonkam ïa ka jingsuk kaba pura, kaba hok bad kaba neh kaba ïadei bad ka aiñ jong ki ri ka pyrthei.
Ka thma ha Ukraine ka la ktah jur ïa ka jingïoh bam bad bor ding ha ka pyrthei, khamtam eh ïa ki ri kiba dang kiew. U Modi bad u Scholz ki la pynpaw ïa ka jingdonkam ban pynneh ïa ka aiñ pyrthei, da kaba kyntu ïa baroh ki ri ban kiar na kaba pyndonkam da ka bor pyrshah ïa ka jinglong trai jaka jong kano kano ka jaitbynriew ne ka jinglaitluid ha ka saiñ hima-sima.
Ki la pynrem ruh ïa ki jingthombor jong ki Hamas ha ka 7 tarik, Risaw, 2023, da kaba pynpaw ïa ka jingsngewkhia halor ka jingïap jong ki riewpaidbah bad ka jingeh jong ki briew ha Gaza. Ki nongïalam ki la khot ban sangeh thma mardor ha Gaza bad ban pyllait noh ïa ki nongshah rahbor kiba la shah kem ha ki Hamas.
Ki la pynksan ban pynbha ïa ka jingsam jingïarap ïa ki briew ha kylleng ka Gaza. Baroh arliang mamla ki la kyntu ïa ki nongïapynibor ban leh da ka jingkitkhlieh ban ïada na ka jingjur shuh shuh jong ka jingïakynad. Ka jinglong jingman kaba nang sniew ha Lebanon ruh ka la long kaba sngewkhia, da kaba la khot ban pynsangeh noh kyrkieh ïa ki jingïaleh pyrshah. U Modi bad u Scholz ki la mynjur ba ki lad jingïadei ki long kiba donkam bha na ka bynta ban pynbeit ïa ki jingïakynad ha Gaza bad Lebanon.
Ki la pynskhem biang ïa ka jingkular jong ki ban pynbeit bad pynïasngewthuh jingmut ïa ki ar tylli ki ri, da kaba pyrkhat ïa ka ri Palestine kaba laitluid kaba im suk-im saiñ bad ka Israel.
Ki nongïalam ki la ban jur ba ka India bad ka EU ki ïasam ïa ki jingmyntoi ban pynthikna ïa ka jingshngaiñ bad ka roi ka par ha ka pyrthei. Ki la pynpaw ïa ka jingdonkam ban pynjylliew ïa ka jingïatreilang hapdeng ka India bad ka EU na ka bynta ka jingmyntoi ha ka pyrthei.
Baroh ar ngut ki nongïalam ki la khot ïa ka jingïatreilang pyrshah ïa ki kynhun lehnoh, kynthup ïa kito kiba la khang da ka United Nations Security Council (UNSC). Ki la kyntu ïa ki ri ban pynduh noh ïa ki jaka rieh tngen jong ki lehnoh bad ban pynduhnoh ïa ki kynhun pyntriem katkum ka aiñ ba la buh.
