Rung ka Morocco & Senegal sha ka African Cup Of Nations, lai sien mad jingshah rem ka Cape Verde

Shillong, Naiwieng 18 Ka Morocco bad ka Senegal, kiba baroh ar tylli ki kynhun kiba la jop teng ïa ka Africa Cup of Nations, ki la long napdeng ki hynriew tylli ki ri kiba la...

Shillong, Naiwieng 18

Ka Morocco bad ka Senegal, kiba baroh ar tylli ki kynhun kiba la jop teng ïa ka Africa Cup of Nations, ki la long napdeng ki hynriew tylli ki ri kiba la ïoh ban ïoh jaka na ka bynta ka lympung ïalehkai jong u snem 2027.

Ka Cameroon, Benin, Burkina Faso bad ka Mali ki la long kiwei pat ki kynhun kiba la ïoh rung na ka bynta katei ka lympung ka ban sdang naduh 19 tarik u Jylliew haduh 17 tarik u Naitung jong u snem ban wan.

Katba ka Kenya, Tan-zania bad ka Uganda ki la ïoh rung lypa namar ki dei ki ri ki ban pynlong ïa katei ka lympung.

Ka Cape Verde, kaba la ïakhaid bad ka Spain ha ka jingïalehkai group jong ka World Cup 2026 bad kaba la rah ïa ka Argentina shaduh ka extra time, ka la ïakhun tyngeh naduh ba ka la wanphai biang sha Africa.

Ka la mad ïa ka jingshah rem kaba lai ha ka Group-K da kaba shah rem da 2-0 ha ka Liberia. Ka jingshah rem ha Paynes-ville ka la pynlong ïa kane ka kynhun ba kan sah ha ka kyrdan ba ha trai duh jong ka mini-league.

Ka Togo ka la jop da 3-0 kol ïa ka Algeria ha ka jingïalehkai World Cup 2026 (qualifier) ha ka Group-I. Baroh ki kol ki la wan ha ka kylla miet ha kaba u Thibault Klidje jong ka Hiber-nian na Scotland, u la thep ar kol.

Hadien ba ka la jop ïa ka Niger da 5-1 ha ka taïew ba la lah, ka Moro-cco ka la khur biang ïa ka jingjop da 1-0 kol haba kine ki kynhun ki la ïakynduh biang. Kane ka la wan lyngba u rangïalehkai shapdeng ka Ajax Amsterdam uba dang 17 snem ka rta u Abdellah Ouazane.

Ka Senegal, kaba la jop ïa ka Sudan ha ka lah sngi U Blei, ka la ai khublei ïa ka Mozam-bique, kaba wan ha ka kyrdan ba-ar, ha kaba ka jingjop jong ka ha Ethiopia da 1-0 kol, ka la pynlong ïa ka ban kiew shaphrang na ka Group-J.

Ka Senegal ka la pynliem da 1-0 kol ïa ka Morocco lyngba ka kol kaba la thep da u Pape Gueye ha ka extra time.

Hynrei hadien na ka liang ka CAF ka la pynbna ba ka Morocco ka dei ka nongjop namar ka kynhun ïalehkai jong ka Senegal ka la mih noh na madan ban pynpaw ka jingpyrshah halor ka jingai ïa ka penalty, kaba ka Morocco kam shym la lah ban thep.

Na ka liang ka Senegal ka la pan na ka Court of Arbitration for Sport (CAS) ha Switzerland ba kan pyndam noh ïa ka rai jong ka CAF bad la khmih lynti ba kan mih ka rai mynta u bnai.

Hadien ba ka la pynliem ïa ka Namibia da 3-0 kol ha ka lah sngi U Blei, ka Cameroon ka la hap ban ap haduh 24 kynta shwa ban pynthikna ba kan rung na ka Group-G hadien ba ka Comoros ka la jop da 1-0 kol ha Congo Brazzaville.

Ka Mali ka la jop saw sien na ki saw tylli ki jingïakhun ha ka Group-K lyngba ka jingjop da 2-0 kol ha Rwanda. U Modibo Sagnan u la thep kol ha ka kylla step bad u Gaoussou Diallo ha ka kylla miet.

Da kaba jop da 3-1 kol ha Mauritania, ka Burkina Faso ka la pynthikna ba ma ka bad ka Benin kaba la pynliem ïa ka Central African Republic da 1-0 ha ka lah sngi u Blei, ki la jam sha ki kyrdan ba kham shakhmat na ka Group-F.