Pynbna jingïarap u Maan na ka bynta kiba ïap bad mynsaw na ka jingjia aksiden

Chandigarh, Naiwieng: U Myntri Rangbah ka Punjab, u Bhagwant Singh Mann, ha ka sngi U Blei, u la pynbna ban ai jingïarap pisa, kaba mar T.5 lak, sha ki bahaïing jong kito kiba la khlad...

Chandigarh, Naiwieng:

U Myntri Rangbah ka Punjab, u Bhagwant Singh Mann, ha ka sngi U Blei, u la pynbna ban ai jingïarap pisa, kaba mar T.5 lak, sha ki bahaïing jong kito kiba la khlad noh ha ka jingshah tynrah bus ha Amritsar bad T.1 lak, na ka bynta kito kiba la mynsaw. U la pynthikna ruh ba ka sorkar jylla kan bei lut ïa ka bai sumar na ka bynta kiba mynsaw.

U Mann u la leit jngoh ïa kawei ka Hospital ha Amritsar ban ïakynduh ïa ki nongleit jingleit kiba la mynsaw ha ka jingjia aksiden hajan ka Naushehra Pannuan. U la pynpaw ka jingsngewlem sha ki longïing kiba la duh noh ïa kiba ïeid bathoiñ jong ki bad bthah ïa ki bor pynïaid hospital ban pynthikna ïa ka jingsumar kaba bha tam na ka bynta kito kiba mynsaw.

Haba phah jingthoh ha ka rynsan X, u Myntri Rangbah u la ong ba kiba bun na kiba mynsaw ki la mih na ka jingma bad la khmih lynti ba kin koit noh kloi.

“Mynta ka sngi, nga la leit jngoh ïa kawei ka Hospital ha Amritsar ban wad jingtip shaphang ka jingkoit jingkhiah jong ki nongleit jingleit kiba la mynsaw ha ka jingshah tynrah bos hajan Naushehra Pannuan.Da ka jingaiei U Blei, kiba bun na kiba mynsaw ki la lait na ka jingma bad la khmih lynti ba kin koit kloi bad kin leit phai noh sha la ïing,” u la thoh.

Haba pynpaw ïa ka jingsngewlem sha ki bahaïing hasem jong ki san ngut kiba la duh noh ïa la ka jong ka jingim, u Mann u la ong ba ka sorkar kan ai pisa mar T.5 lak sha kawei pa kawei ka longïing kaba la duh noh ïa ka jingim bad T.1 lak sha baroh kiba la mynsaw, ryngkat bad ka jingsumar kaba khlem jingsiew pura.

“Ka sorkar ka ïeng ryngkat ryngkat bad ki paidbah jong ka ha man la ka por kaba eh”, u la bynrap.

Ha ka jingïakren jong u bad ki lad pathai khubor, u Mann u la ïathuh ba 11 ngut ki briew ki la mynsaw ha katei ka jingjia aksiden, katba saw ngut ki nongleit jingleit bad uwei u nongñiah thuk thuk ki la duh noh ïa la ka jong ka jingim.

Haba batai ïa kane ka jingjia kum kaba sngewsih haduh katta katta, u Myntri Rangbah u la ong ba ka sorkar jylla ka ïeng skhem bad ki longïing kiba shah ktah bad kan ai ïa ki jingïarap baroh katba lah.

U la bynrap ba la bthah ïa ki bor synshar paidbah bad ki bor synshar pulit ban ïarap ïa ki longïing jong kiba la mynsaw bad ban pynthikna ïa ka jingsumar kaba biang na ka bynta kiba mynsaw.

U Mann u la duwai ruh na ka bynta ka bor na ka bynta ki longïing kiba la duh noh ban ïakhun ïa ka jingduh jong ki bad ka jingsuk na ka bynta ki mynsiem kiba la khlad noh.

Haba pynpaw ïa ka jingpoi jong ka Mukh Mantri Tirath Yatra Yojna, u Mann u la ong ba 7,02,203 ngut ki nongleit jingleit ki la ïoh jingmyntoi na kane ka skhim lyngba ki 17,531 tylli ki jingleit jingwan da ki bos sha ki jaka leh niam ha kylleng ka ri.

Kine ki jaka ki kynthup ïa ka Amritsar, Sri Anandpur Sahib, Haridwar-Rishikesh, Khatu Shyam bad Mathura-Vrindavan.

U Myntri Rangbah u la ong ba palat 70 tylli ki bos ki treikam man ka sngi hapoh kane ka jingthmu, kaba ïarap ïa palat 3,000 ngut ki nongmane ban leit jingleit man ka sngi. Da ki hajar tylli ki jingleit jingwan la pyndep da kaba jop, bad kum kane ka jingjia kaba sngewsih kam shym la jia ha kine ki jingleit jingwan, u la bynrap.

U Myntri Rangbah u la kyrpad ïa ki seng pyrshah ba kim dei ban pynkylla ïa katei ka jingjia aksiden sha ka jingïakren saiñ pyrthei, da kaba ong ba kum kine ki jingjia kiba sngewsih ym dei ban pynlong saiñ pyrthei ne ban pynshong nongrim ha ka jingbym shimkhia jong ka sorkar.

“Ka long kaba sngewsih haduh katta katta ba kum kane ka jingjia kaba sngewsih ka la jia, hynrei ym dei ban pynlong politik ïa ka, ym dei ban pynshong nongrim ïa ka jingjia ha kano kano ka jingbakla na ka liang ka sorkar. Ka sorkar Punjab ka dang ïai bteng ban ïada ïa ka jingshngaiñ bad jingbha jingmiat jong uwei pa uwei u nongshong shnong”, la ong u Mann.

U la pynpaw ruh ïa ka bynta jong ka sorkar Punjab ka Sadak Surakhya Force (SSF), da kaba pynpaw ba ka la ïarap ban pynduna ïa ki jingjia aksiden ha surok bad pynim ïa ki jingim ha kylleng ka jylla lyngba ki jingïarap kyrkieh bad ki jingïarap ban ïada ïa ki surok.

U Mann u la pynpaw biang ba ka sorkar jylla kan ïeng ha ka liang jong ki longïing kiba shah ktah bad kan pynthikna ba kin ïoh ïa ka jingkyrshan baroh kaba lah ha kane ka por kaba eh.