Shillong, Naiwieng 18
Ka jingïakop mareh Half Marathon 2026 ba la pynlong da ka Border Security Force (BSF) Meghalaya Frontier ka la long kaba shongkun ha ka sngi Balang ha kaba la wan shim bynta da palat 4,200 ngut ki nongshim bynta na kylleng ka Jylla.
Ïa kane ka jingïakop mareh halor ka phang pdeng ‘Run Above the Clouds’ la sdang na ka shlem ai jinghikai jong ka Sports Authority of India (SAI) Shillong kaba ha NEHU bad la ïaid kylleng ki bynta jong ka nongbah bad ban wanphai biang ha katei kajuh ka jaka. Kane ka prokram ka hap hapoh ka SPANDAN jong ka Sports Authority of India bad ka jingthmu jong kane ka long ban wanrah ïa ka jingkoit jingkhia, ban don ïa ka mynsiem kum ki nongïalehkai bad ban pynïoh ha ki samla kiba shait ba khlaiñ.
Kane ka jingïakop mareh ka kynthup ïa ka 21-km bad ka 10-km jong ki kynthei bad shynrang ha la ki jong ki kyrdan katba kum ki rta jong ki. Kiba la wan shim bynta ki kynthup naduh ki nongmareh ba paw, ki longkmie na ki shnong ki thaw, ki samla pule bad kumjuh ki shipai BSF.
Ïa kane ka jingïakop la kaweh lama da u Director General ka BSF u Praveen Kumar ha ka por 5.45 mynstep ha kaba la ïadon lang u ADG, Eastern Command u Sumit Sharan, Inspector General ka Megha -laya Frontier u O.P. Upadhyay bad kiwei ki heh jong katei ka kynhun shipai bad kumjuh na ka SAI.
Na ka liang u Myntri Rangbah ka Jylla u Conrad K. Sangma u la ïadon bynta lang ha ka jingpynhap pyrda ïa kane ka jingïakop mareh bad ban sam khusnam sha ki nongmareh kiba la khur jingjop.
Na ka liang u Sangma u la pynpaw ka jingïaroh ïa ka jingshimkhia jong ki shipai BSF ban ai ïa ka rynsan ïa ki nongïalehkai bad ki riew ïeid ïa ka jingkilanmet ban pyni ïa ki sap jong ki.
U la ban jur ïa ka jingdonkam ban pynkhih met bad ka rukom im kaba koit ba khiah, da kaba kyntu ïa ki samla ban wanrah ka jingkoit jingkhiah ha ka jingim ba man ka sngi.
Na ka liang ki nongpynïaid ki la ong ba ka jingïashim bynta jong ki samla pule, ki kynthei bad kiba la kham rangbah ka long kaba ai mynsiem khamtam, kaba pyni ïa ka jingsngewtynnad jong ki kam ïalehkai.
Ïa baroh ki khusnam kiba la kot sha ka T.13 lak la sam sha baroh ki nongjop ha la ki jong ki kyrdan jingïakop.