Shillong, K’lyngkot 10
Ka Meghalaya Pradesh Congress Committee (MPCC) lyngba ka kyrwoh na ka General Secretary, MPCC I/c Administration, Kong Wansuk Syiem ha ka Sngi Thohdieng ka la pyllait ïa ka thup kyrteng ba ar jong ki kyrtong ban ïa aireng na ka seng ha ka ilekshon ban wan sha Khasi Hills Autonomous District Council (KHADC) bad Jaiñtia Hills Auto-nomous District Council (JHADC).
Kine ki kynthup ïa 11 ngut sha ka KHADC bad 5 ngut sha ka JHADC.
Kitei 11 ngut ki kynthup ïa u Bah Victor Ranee na 1-Jirang, Bah Micky Dauglas Syiem na 5-Umroi, Bah Lambor-sing Nongrum na 8-Nongkrem, Bah Rilang Nongkhlaw na 9-Langkyrdem-Laitkroh, Bah Monarch Shabong na 10-Nongshken, Bah Batskhem Marbaniang na 12-Mawsynram, Bah B. Vitus Rymmai na 13-Sohra, Bah George Sun na 21-Mawphlang-Diengïei, Bah G. Ningstar Marthong na 27-Nongstoiñ, Bah Kodang Rashir na 29-Mawshynrut bad Bah Pherdonnam Rngaid na 26-Langrin.
Katba ki 5 ngut kiwei pat ki kynthup ïa u Bah Bitos Sari na 5-Mukhla-Ummulong, Bah Katbanbiang Lamare na 7-Nartiang, Bah Richard Singh Lyngdoh na 9-Mynso-Nongjngi, Bah Saron Pasweth na 19-Jowai South bad u Lalwilliama Thiaite na 27-Saipung-Nongkhlieh.
Hashuwa, ka seng ka la dep ban pynbna ïa ka thup kyrteng jong 26 ngut ki kyrtong ki ban ïa aireng ha ka ilekshon MDC ban wan ba kynthup ïa 15 ngut sha KHADC bad 11 ngut sha JHADC.
Kane ka la long hadien ka jingjied kaba la don bynta lang da ki Block Congress Committee (BCC), District Congress Committee (DCC), bad ka Pradesh Election Committee (PEC).
Ka seng ka la ong ba ki kyrtong kiba la shah jied ki kynthup lang ïa kito kiba thymmai, ki ‘riew shemphang kiba tbit, bad ki ‘riew shimet kiba la shah hikai ban shakri bha ha ki kam jong ki.
Ka la ong ruh ba kane ka jingpynbeit ka ban jur ïa ka jingangnud jong ka Congress ban wanrah ïa ki nongïalam kiba tbit bad kiba shlur, kiba aiti lut na ka bynta ka bha ka miat bad ki jingangnud jong ki paidbah ka Jylla.
Shuh shuh ka seng ka la pynpaw ba katba nang jan sha ka ilekshon, ka kyrpad ïa ki nongthep ‘vote’ jong ka Ri-lum Khasi bad Jaiñtia ba kin buh ïa ka jingshaniah ha ka Congress bad ha ki kyrtong ka seng.
Ka seng ka ïeng skhem ban ïada ïa ki kyndon jong ka Khyrnit bahynriew bad ban pynneh ïa ki hok bad jingmyntoi jong ki jaidbynriew ‘riewlum.
Nalor kane, ka seng ka kyrmen ba ki paidbah ka Jylla kin ai ïa ka rai kaba shai ïa ka Congress – ka ban pynlah ïa ka seng ban bteng ïa ka jingthmu jong ka ban kiew shaphrang, ban roi, bad ban pynïoh ïa ka hok na ka bynta baroh.
