Shillong, Risaw 09
U State-President ka NPP bad Symbud Myntri Rangbah ka Jylla, Bah Prestone Tynsong u la ong ba dei tang ka NPP, kata ka ‘National Party’ kaba la mih na ka Thaiñ Shatei Lam Mihngi bad kaba la lah ban pyllait ïa ka jingpyntreikam jong ka Citizenship Amend-ment Act (CAA) hapoh Meghalaya kumjuh ban tuklar halor ka jingpynkylla ïa ka FCRA.
Haba ai jingkren ha ka jingïalap ilekshon ha Mylliem na ka bynta u kyrtong ka seng sha ka ilekshon shiteng samoi jong ka Shillong Lok Sabha, u Dr. D.R.L. Nonglait, u Bah Prestone u la ong ba ka kyrdan jong ka seng ha ka ri ka la wanrah ïa ka jingithuh bad ki jingmyntoi kiba shisha sha ka Jylla.
“Pyrkhat bha, na ki 8 tylli ki Jylla ka Thaiñ Shatei Lam Mihngi, tang ka NPP kaba dei ka ‘National Party’, wat ka Assam ruh kam don wat tang kawei ka ‘National Party’. Haba ngi ong ‘National Party’, ka mut ba ka ‘Election Commission’ ka la bishar bniah na baroh ki liang kaei ka jait seng kaba dei hok ban long ka ‘National Party’,” la ong u Bah Prestone.
“Ka dei ka jingieit ba kyrpang jong U Blei ïa ka Meghalaya. Ha u snem 2019, ka ECI ka la pyntip sha u President jong ngi, u Conrad K. Sangma ba ka NPP mynta ka la dei hok ban shah ñiew kum ka ‘National Party’,” u la ong.
Haba jer ïa ki jingmyntoi, u Bah Prestone u la kdew sha ka ophis jong ka seng kaba don ha North Avenue ha New Delhi.
“Ka Sorkar India ka hap ban ai ophis ha Delhi. Mynta ka NPP ha Delhi ka don ka ophis kaba don ïa ka dur jong u P.A. Sangma, u Conrad K. Sangma bad jong nga. Hapoh ka Thaiñ Shatei Lam Mihngi, hato don kano-kano ka seng kaba mih na kine ki Jylla kaba don ophis ha Delhi? Ym don kawei ruh,” u la ong.
“Ka Meghalaya ka dei kaba rit ha ka jingbun briew, hynrei ka nongbah Delhi ka tip ïa kane ka Jylla. Ha u snem 2019 haba phaidien, ym don ba kren shaphang ka Meghalaya. Hynrei naduh u snem 2019 ter-ter, tang shu ong Meghalaya, ki kynmaw ïa ka North Avenue ha Delhi,” u la ong.
Haba pynkynmaw ïa ki jingïakhih pyrshah ïa ka CAA ha u snem 2019, u Bah Prestone u la ong, “Ngi kynmaw kaei kaba la jia ha u snem 2019 ha ka por jong ka CAB, ka la jan long kumba thang ïa ka Thaiñ Shatei Lam Mihngi. U Conrad K. Sangma u la ïalam ïa ka kynhun jong ki seng saiñ pyrthei na ka Thaiñ Shatei Lam Mihngi bad ki NGO na Meghalaya bad ïakynduh ïa u Amit Shah. Ngi la ong ka Meghalaya ka dei ban treikam katkum ka Khyrnit ba 6. Ka la rung ha jabieng jong u Amit Shah. Hadien shi taïew u la pyntip sha u Conrad bad ong, ‘Ka long kaba shisha, ka Khyrnit ba 6 ka treikam pura ha Meghalaya lait noh tang ha ki katto-katne ki jaka ba la khot ‘European Ward’, na kata ka daw, yn ym pyntreikam ïa ka CAA’.”
“Pyrkhat bha, kiwei ki Jylla ki pyntreikam, hynrei ha Meghalaya pat ym shym la pyntreikam, kita ki dei ki dak kiba ka seng ka leh,” u la ong.
Halor ka Foreign Contribution Regulation Act (FCRA), u Bah Prestone u la ong, “Mynta ka don sa kawei ka mat kaba baroh ha ka Thaiñ Shatei Lam Mihngi ki sheptieng, kata ka jingpynkylla ïa ka FCRA. Lyngba ka NPP, lyngba u National President jong ngi uba dei ruh u Myntri Rangbah ka Jylla, u Conrad K. Sangma, u la ïalam ïa kiba bun ki kynhun niam ban ïakynduh ïa ki nongïalam ha Delhi. Namarkata, ïa ka ‘Amendment Bill’ la phah sha ka JPC ban khmih bniah.”
“Na ka Thaiñ Shatei Lam Mihngi ym shym la don wat tang uwei ruh u dkhot ha ka JPC. U Conrad u la leit biang ban ïakynduh ïa u Lamphang bad ha kaba kut, u Lamphang u la thung ïa u James P.K. Sangma. Hato kata kam dei ka burom?” u la ong.
U Bah Prestone u la ther ruh ïa ki nongkynthoh kiba ñiew ïa ka NPP kum ka seng ba nabar ne ka seng Garo.
Na ka liang jong u, u la kyrpad ïa ki nongthep ‘vote’ ban kyrshan ïa u Dr. Nonglait, da kaba ong, “To ngin ïatreilang, ai ka jingkyrshan kaba pura ïa u Dr. Nonglait khnang ba un long u MP jong ngi bad un shong ruh ha kata ka jaka ba ngi la buh ïa ka ophis, khnang ba ki briew jong ka Meghalaya kin sngew shngaiñ bad kin ïoh mynsiem haba ki ïohi ïa ki dur jong ki nongïalam ba radbah na ka Jylla kaba rit kum ka Meghalaya.”
