Shillong, Risaw 09
Ki nongshet ja skul ki ba don ha ka Jylla ha ka Sngi Thohdieng ki la rai ba naduh ka taïew ban wan jong u bnai Risaw 2026 kin leit shet ja skul tang shisien ha ka shitaïew bad ha ka taïew ba nyngkong jong u Rymphang 2027 kin sa lum biang ïa ka ‘General Meeting’ ban shim ïa ka rai ba tyngeh.
Ïa kane ka rai la pynbna da ka President jong ka Union of Cook Cum-helper PM-POSHAN ka Kong Gina Nengnong ha ka ‘General Meeting’ kaba la long ha madan Malki, Shillong.
Ha kane ka jingïalang la ïohi ba palat hajar ngut ki nongshet ja skul ba na kylleng ki jaka jong ka Rilum Khasi-Jaiñtia bad Garo ki la wan ban shim bynta, ban pynpaw ïa ka jingsngewkhia halor ka jingbym lah ka Sorkar India ban pynkiew ïa ka jingsiew (Honorarium) na ka T.900 shi bnai sha ka T.9000 shi bnai ba ki la dawa na ka por sha ka por.
Haba kren ha kane ka sngi ka Kong Gina ka la ong ba ki nongshet ja skul ka Jylla haduh mynta ki dang ap ïa u Myntri Rangbahduh ka Ri u Narendra Modi ba un jubab ïa ka jingdawa jong ki bad haduh mynta ki dang ap ïa ka Sorkar ba kan shong ïa ka Union Cabinet.
“Katba ngi dang ap ïa ka jubab u Myntri Rangbahduh ka Ri, ha kine ki ar bnai kata u bnai Risaw bad Naiwieng ngi la rai ba ngin leit shet ja skul tang shisien shi taïew bad ngin ïarap sam ïa u khaw sha ki khynnah khnang ba u khaw un lait pyut. Ngin trei kumba ki thoh ba ka kam jong ngi ka dei kaba trei mon sngewbha, ngi ruh ngin trei sngewbha” ka la ong.
Nalor kane ka Kong Gina ka la ong ba kin ap ïa ka jingthoh na u Narendra Modi ha kine ki ar bnai hynrei ha ka taïew ba-ar jong u Rymphang 2027 kin sa lum biang ïa ka ‘General Meeting’ bad ha katei ka jingïakynduh lang kin sa shim ïa ka rai kaba khatduh ba kin dang bteng ban pynbha ïa ka kam lane ba kin pynkut noh shisyndon ïa ka jingshakri jong ki.
“Lada ngi ïoh ïa ka jubab kaba biang ngin bteng bad pynbha ïa ka kam, hynrei lada ngim ïoh ïa ka jubab ban pynkiew ïa ka jingsiew (Honorarium) ngin pynbna ban pynkut noh shi syndon ïa kane ka skhim” la ong ka Kong Gina.
Kiwei de ki nongïalam ka Union kiba ai jingkren ha kane ka sngi, ki la pynsngew ba ka jingtrei jingktah jong ki, kam ïahap shuh bad ka jingsiew ba ki ïoh na ka Sorkar namar man ka sngi ki treikam ym duna ïa ka 6-7 kynta, katba ka bhah jingsiew ba ki dei ban ïoh na ka Sorkar Pdeng ka neh sah tang T.900 ha kine ki arphew snem tam bad kynnoh ba kane ka la long kumba ka Sorkar ka ñion beiñ ïa ki.
