Shillong, Risaw 09
U Adviser jong ka Union of Cook-cum-Helpers PM-POSHAN u Bah Khroo L Pariat haba ai jingkren ha ka jingïalang paidbah ha madan Malki, u la ther tyngeh ïa ki nongïalam kiba ki paidbah ki la jied sha KHADC, sha ka Ïingdorbar Thawaiñ ka Jylla bad sha ka Ïingdorbar bah ka ri ha Parliament.
U la ong ba ki nongshet ja skul mynta la arphew snem tam ki ïoh ïa ka jingsiew kaba tang T.900 shi bnai na ka Sorkar Pdeng bad T.1,100 shi bnai na ka Sorkar Jylla, hynrei ym don ba mih ban kren ha Ïingdorbar ban sngewkhia ïa kane bad ym don hi ruh ki nongmihkhmat kiba mih ban ai mynsiem ha ka jingïakhih ki nongshet ja skul kiba dawa ban pynkiew ïa ka jingsiew jong ki.
“Kane ka jingkylli ka sawa jam mynta, shano ki MDC, MLA bad MP? Ym don uwei ruh u ban ong ban kylli ïa ki jingeh jong ngi, haba ki la tip ba ngi don kane jingïakynduh lang mynta ha Madan Malki” la ong u Bah Pariat.
U la ong ba naduh u snem 2022 ba ki la sdang ban dawa pynkiew ïa ka jingsiew, haduh kine ki sngi ym don kiba kren ne kylli ïa ki jingeh jong ki bad dei na kane ka daw ba kum ka Union ka hap ban shim da ka sienjam ban kyrpad hi beit-beit shaduh u Myntri Rangbahduh ka Ri u Narendra Modi.
U la pynkynmaw ba ha ka jingïaid lynti ka jingdawa ka Union ka la phah bun tylli ki jingthoh sha ka tnad ba dei peit jong ka Sorkar Pdeng bad sha u Myntri Rangbahduh ka Ri lyngba u Lat ka Jylla.
U la pynkynmaw ruh ba ki nongshet ja skul ha ka Jylla 98% na ka 100% ki dei ki longkmie kiba long ki nong pynbiang ïa ka bam ka dih, u la kyntu ïa ki nongmihkhmat paidbah ba kin burom ïa ki longkmie kiba long ka kmie, ka kurim bad ki hynmen ki para.
U la kyntu ruh ïa ki nongshet ja skul ba kin long kiba husiar bad kiba stad ha kine ki sngi ban jied ïa ki nongmihkhmat paidbah ha ka por ilekshon.
