Shillong, Nohprah 12
Ka shnong Khandong kaba hap ha Dima Hasoa District jong ka Jylla Assam ka long shisha ka surok kaba sniew mar shu lait ïa ka shnong Saphai kaba hap ha West Jaiñtia Hills District.
Kane ka jingsniew ka surok la lap ha ka por ba ki nongthoh khubor na Shillong ki la hiar sha Umrangso, Assam ban leit lum khubor ïa ka Kupili Hydro Power project jong ka NEEPCO kaba dei ka project pynmih bording.
Haba ïaid ïa ka surok na Shillong sha Jowai, Raliang haduh Saphai ka long shisha kaba kham bha ka surok hynrei mar shu jam ïa kawei ka jingkieng haba la poi ha Khandong kaba hap ha Jylla Assam la ïohi ïa ka surok ka long kaba sniew.
Kane ka jingsniew ka surok ka la sdang ha jaka ba peit ka tnad forest ka Jylla Assam.
Shuh shuh haba ki nongthoh khubor ki la ïaid kumba 5 kilometre ka surok ka dang sniew hynrei la ïohi ba ki nongñiah auto rickshaw kiba kamai ki long kiba tbit namar ki lah ban ïaid ïa ka surok kaba khohruh khohram ban kit ïa kiba leit ba wan.
Nalor ka jingsniew ka surok, ki paidbah kiba sah ha katei ka thaiñ ki mad ruh ïa ka jingpum pum ba mih na ka surok.
Hynrei ynda la ïaid kham shakhmat la ïohi ba ïa kane ka surok la shna pynheh hynrei ym pat siangrong.
La ïoh jingtip ba ka sorkar Assam ka la dep mang pisa ban shna surok na Khandong kaba hap ha khappud Meghalaya hynrei u kontraktor um lah ban shna namar ki don shibun ki jingeh.
Kane ka surok ka dei kaba ki Khasi-Pnar ki leit ki wan namar ki bun kiba sah ha Dima Hasoa district ban leit rep bad shongshnong ha katei ka district namar ka don markhap bad ka West Jaiñtia Hills district.
La ïohi ruh ba haduh Khandong ki kali na Meghalaya ki leit ki wan ban kit briew namar ka don markhap bad ki shnong Khasi ha Meghalaya.
