Shillong, Lber 02
Ha ki por ba kham mynshuwa bym pat don surok ha ki shnong ki thaw, ki kulai ki dei kiba ïarap ha ka leit ka wan kumjuh ruh ha ka kit ka bah ïa ki mar rep ban pynpoi sha ki ïew ki hat bad ka ju don ruh ka jingpynïa mareh kulai man la u snem ha kitei ki por, hynrei ha u snem 1998 la pynkut noh ïa ka jingpynmareh kulai namar ka jingkylla jong ka por.
U Sordar shnong Mawsadang u Bah Bimar Sing Nongbet u la pyntip ba ha kane ka kynti sa shisien pat ka shnong ha ka jingïatreilang bad ka Ïatreilang Foundation kan pynlong biang ïa ka jingpynmareh kulai ha ka 14 tarik Lber 2026.
U la ïathuh ba kane ka sienjam ba ka shnong ha ryngkat ka Foundation ka la shim ban pynlong biang ïa ka jingmareh kulai ka long ban kynmaw bad ban pynkhie-im biang ïa kaei kaba la leh ha ki por barim ryngkat ka jingthmu ban lum ban lang ïa ki nongrep bad ban nang pynshlur kumjuh ban ai jinghikai ïa ki nongrep ba hapoh jong ka thaiñ.
Shuh-shuh u la ïathuh ïa ka Shnong Mawsadang ba ka dei kaba im ha ki kam rep kam riang bad la pynlong shnong nyngkong ïa katei ka shnong naduh ka snem 1888 na ka jingwan ban rep ïa ki jaka ba sboh bad ba seisoh hynrei suki-suki ka la long shnong bad haduh mynta ruh ki briew ki dang shaniah bad im ha ka kam rep.
U la ïathuh ba ha ki por ba mynshuwa ki briew kiba shong ba sah ha katei ka jaka ki ju pyndonkam ïa ki kulai ha ka kit ka bah bad ban pynpoi ïa ki mar rep kum sha ïew Tyrsad lane ïew Mawphlang namar ba ha kito ki por ym pat don surok lane kali, ka Shnong ka ju pynlong ruh ïa ka jingpynmareh kulai man la u snem ha ki por ba la leit bad ka pawnam bha ruh na ka jingpynmareh kulai.
U Bah Banlamjingshai Marbaniang u ba dei u ‘Technical Expert’ ka Foundation u la ong ba ha katei ka sngi ka sa don ka jingsam ïa ki symbai jhur sha ki nongrep, symbai dohkha, ki khun sniang, ki khun syiar sha ki nongri jingri bad ka Foundation ka don jingthmu ban pynïasoh lang ïa ka kam rep kam riang bad ka kam jngohkai pyrthei ban khring ïa ki nongwan shangkai pyrthei.
U Bah Khrawborlang Lyngdoh Secretary ka Ïatreilang Foundation u la khot bad wer ïa ki paidbah nongrep jong ka thaiñ ban wan ba ïashim bynta ha katei ka sngi kumjuh ruh ba kan sa don ka jingpynkupbor kyrpang ïa ki nongrep bad kin sa don shibun ki jait jingïalehkai ki ban pynbyrngia pynsngewtynnad ïa ki paidbah.
