Shillong, Lber 02
Ka Hynñiewtrep Integra-ted Territorial Organiza-tion (HITO) Students Wing hapoh ka jingïalam u Samla Iajanlang Sohtun, Chairman, ha ka 02 tarik u Lber 2026, ka la leit ban ïakynduh ïa u Director ka Directorate of School Education and Literacy (DSEL) halor ka jingïoh jingujor ba ka tnad kam pynbna paidbah ïa ki nongïoh skhim jaiñ skul (Uniform Grant) lyngba ka Direct Benefit Transfer (DBT).
Haba kren sha ki lad pathai khubor u Samla Iajanlang Sohtun, Chairman ka HITO Students Wing u la ïathuh ba ka ophis DSEL kam shym la pynbna paidbah lyngba ki ‘Advertisement’ ne ki jingpynbna (Notification) halor ka jingdonkam ka skhim jaiñ skul (Uniform Grant).
U la ong ba ka Directorate ka la shu pynmih ka jingpynbna lyngba ka YouTube Channel ba ka ai kyrteng “Education Dept. Meghalaya” bad kane ka Channel kam poi lut sha ki briew kiba dei ban ïoh ïa ka skhim khamtam ha ki thaiñ nongkyndong ba duna ka ‘Mobile Network’.
“Lyngba ka YouTube channel ba ka ai kyrteng “Education Dept. Meghalaya” ka ophis DSEL ka la pyntip paidbah ba ka por ban aplai ïa ka skhim jaiñ skul (Uniform Grant) lyngba ka Direct Benefit Transfer (DBT) kan plie tang 24 kynta, kata naduh 26 tarik bad kut ha ka 27 tarik u Rymphang,2026. Kane ka por ba buh ka ophis ka long ka bym lah ban pdiang,” la ong u Samla Iajanlang.
Nalorkata, u ong ba ka seng ka la buh jingkylli ruh ba balei ka DSEL kam shym la pynbna paidbah sha ki lad pathai khubor ban tip lut baroh hynrei la shu pynbna tang hapoh katei ka YouTube Channel jong ka tnad pule puthi bad bun kim ïoh jingtip halor kane.
Shuh shuh ka la dawa ruh ba ka tnad kadei ban buh biang ïa ka por haba ïadei bad kane ka skhim jaiñ skul (uniform Grant).
