Nongstoiñ, Lber 02
Ka jingbym suidñiew jong ka Sorkar Jylla ban buh nongtrei noh hapoh Langpih Health Sub-Centre haduh mynta, ka la pynlong ïa kane ka jaka sumar lane ïingmala ban kylla ïingjah bad sop ruh da ki sañium ha kaba ym i-kop shuh ban ong ba ka dei kaba la shna na ka bynta ka koit ka khiah.
Ïa kane ka pyntikna da ka ka Federation of Khasi Jaiñtia & Garo People (FKJGP) Rimuliang Circle, hadien ka jingud jingnam jong ki paidbah ha kaba ha ka 27 tarik Rymphang 2026, hadien ka Executive Meeting kaba la long ha Langpih ka la ïoh ban leit jurip ha kaba ka seng ka la lap bad ïohi ba kane ka jaka sumar la sop da ki sañium baroh sawdong.
U Bah Serbilin Lyngdoh, President FKJGP Rimuliang Circle u la ong ba na ka liang ka Sorkar ka la mynjur ban buh ïa ka kane Health Sub-Centre bathymmai ha Langpih naduh ki snem ba kham mynshuwa, ha kaba na ka liang ka Sorkar ka la dep tei ruh ïa ka ïingmala jong katei ka Sub-Centre bathymmai naduh u snem 2022.
“Ngi dap da ka jingsngewsih kaba jur ban ïohi ba ka dong ka thaiñ kan shah iehbeiñ haduh katne khamtam ka thaiñ Langpih kaba long ruh kawei na ki jaka kaba jur bha ki briew kiba ju ïoh ïa ka ‘Malaria’, ‘Typhoid’ bad kiwei,” ong u Bah Serbilin.
Shuh shuh u la ong ba kajingdawa ban ïoh ïa ka Health Sub-Centre ha ka thaiñ Langpih ka long ka mat kaba la ïaid lynti jrong bha ha kaba na ka liang ka seng ka la ju dawa naduh ki snem ba mynshuwa bad sngewkmen ban tip ba ka Sorkar ka la mynjur ban buh ïa kane ka Sub-Centre ha Langpih, hynrei ka long kaei-kaei kaba ym lah ban pdiang ban shubuh kai ïa kane ka ïing khlem da pyndonkam ïa ka kum ba la thmu.
“Ngi dap da ka jingsngew bitar ba haduh mynta kane ka Sorkar kaba ju kop ïa ki jinglah jong ka ban wanrah ïa ki kam pynroi hynrei kam lah pat ban pyntreikam noh wat tang ïa kane ka Health Sub-Centre ha ka thaiñ nongkyndong,” ong u Bah Serbilin.
Shuh shuh u Bah Serbilin u la ong ba ka seng ka dawa jur ïa ka Sorkar lyngba u Myntri ba dei peit ba kam long kaba dei ban shu buh ïingjah ïa ki ïing Sorkar haduh lai bad saw snem khlem da pyntreikam ïa ki.
“Kum ka seng ngi la ju thoh na ka por sha ka por sha ka ophis jong ka District Medical & Health Officer, Nongstoiñ ban kyrpad ban pyntreikam noh ïa kane ka Health Sub-Centre ha Langpih hynrei kine ki jingthoh baroh ki shu kut khlem treikam eiei, kane ka pyni ïa ka jingbym kheiñ snep jong kita kiba don ha ka bor ïa ki jingpynsngew jong ki ophisar jong ki hi na ki distrik bapher-bapher kiba ju pynsngew ïa ka jingdawa jong ngi ki paidbah na ki dong bad ki thaiñ bapher-bapher,” ong u Bah Serbilin.
U Bah Serbilin u la ong ruh ba hato ka Sorkar ka kwah ba ki paidbah kin leit pynklumar shuwa ha Secretariat na ka bynta ban ïoh ïa ki jingdawa jong ki?
“Ngi dawa jur ba ka Sorkar kan pyntreikam bad buh noh ïa ki nongtrei hapoh ka Health Centre ha Langpih,” u la ong.
