Shillong, Lber 02
U Myntri Sorkar Pdeng ka tnad Social Justice & Empowerment, u Virendra Kumar ha ka Lah Sngi U Blei u la ong ba ka Meghalaya ka la pyndep haduh 23,624 tylli ki jingtei ïing hapoh jong ka Pradhan Mantri Awas Yojana (Urban & Gramin) na ki palat 25,000 tylli kiba la mang, ha kaba ki nongïoh jingmyntoi ki ïoh pdiang ruh ïa ka bording, ka um bad ki jaka leit bar lyngba ka jingpynïasoh lang ïa ki skhim.
“Ka PM Awas Yojana ka dei u rishot ba kongsan jong ka jingpynkupbor ïa ka imlang-sahlang,” ong u Kumar hadien ba la pynïaid ïa ka jingïalang khmih bniah kaba la long ha Tara Ghar, State Guest House da kaba bynrap ba ka jingpyndep ïa ki jingtei ïing ha ka ri baroh kawei ka la palat ïa ka 4 klur naduh u snem 2014.
“Ym dei ban pynduh ïano-ïano ruh,” u la ong, da kaba kyntu ba ka jingmyntoi kaba 100% kan poi sha kiba dei hok ban ïoh jingmyntoi.
U la kdew ba ki jingpynïasoh LPG ki dang sahdien bad u la khot la wer na bynta ka jingïatreilang ban pynpoi sha ka thong kaba 100%.
Ha kane ka jingïalang ba la ïashim bynta da u State Adviser ka tnad Social Welfare, Bah Paul Lyngdoh, Deputy Commissioner ka East Khasi Hills, Kong R.M. Kurbah lem bad ki ophisar na ki tnad treikam bapher-bapher, la khmih bniah ruh ïa baroh ki prokram ba la kyrshan da ka Sorkar Pdeng.
U Kumar u la ñiew ïa kane kum ka “sienjam ïatreilang hapdeng u Myntri Rangbahduh, u Narendra Modi bad u Myntri Rangbah, u Conrad Sangma,” da kaba batai halor ka Sorkar ‘Double-Engine’ bad kdew ba “ha ki katto-katne ki tnad treikam, nga la sakhi ba ka jingpyntreikam ka long kaba bha shi kat dei.”
Halor ki lad kamai, u la kdew ïa ka Viksit Bharat-GBC Rozgar Ajeevika Mission (Gramin) kum shi bynta jong ka jingshimkhia ïa ki jaka nongkyndong, da kaba ong ba ka jingthmu jong ka Sorkar Pdeng ka long ban pynkylla ïa ka jinglah sha ki “jingpynbha ba lah ban ïohi” lyngba ka jingïatreilang hapdeng ka Sorkar Pdeng bad Sorkar Jylla.
