Mawkyrwat, Naiwieng 06
Ka South West Khasi Hills District Arm Wrestling Association ha ryngkat ka South West Khasi Hills Sports Association, ka la pdiang burom ïa u Jimmison Marweiñ uba la wan phai jong u sha la shnong, hadien ba u la wanrah nam bad ka burom ïa ka district, ka Jylla Meghalaya bad ka ri India hi baroh kawei lyngba ka jingïashim bynta ha ka 47th World Arm Wrestling & 28th Para Arm Wrestling Championships 2026 kaba la long naduh ka 28 Risaw haduh 6 tarik mynta u bnai ha New Delhi.
Kane ka la long ruh ka sien kaba nyngkong ïa u ban leit mihkhmat, ha kaba u Jimmison u la lah ban khur ïa ka takma rupa ha ka liang ki samla.
Kane ka jingjop ka long ka jingkmen bad ka jingsarong kaba khraw ïa ka dong ka thaiñ baroh kawei, khamtam eh ïa ka South West Khasi Hills Arm Wrestling Association, namar ka pyni ïa ka sap bad ka jinglah jong ki samla jong ka distrik ban poi sha ki kyrdan ïalehkai kiba heh ha ka pyrthei.
Ka jingjop jong u samla Jimmison kam dei tang ka jingjop jong ka district, hynrei ka long ruh ka jingjop kaba wanrah nam bad burom ïa ka Jylla Meghalaya bad ïa ka ri India hi baroh kawei. Ka jinglah jong u ban khur ïa kane ka takma ha ka sien kaba nyngkong jong ka jingïashim bynta jong u, ka long ruh ka jingai mynsiem bad ka jingpynshlur ïa kiwei pat ki samla ïalehkai ban trei shitom bad ban pynjanai ïa la ki sap ha ki jingïalehkai bapher bapher, khamtam eh ha ka jingïalehkai Arm Wrestling.
Ha katei ka jingïalang kaba la long ha ka sngi Balang, la ïoh ruh ban aiti ïa ka jingaisngewbha sha u Jimmison kum ka dak jong ka jingsngewnguh, sngewburom ïa ka jingjop jong u, kaba la aiti da u Bah H.S. Diengdoh, President jong ka SWKHSA ha ryngkat ka jingdonlang u Bah Eldestson Wanñiang, President lem bad ki dkhot jong ka.
