Shillong, Naiwieng 06
Ka tnat ïalehkai ka Sorkar Jylla ka la buh ka jingtyrwa ban ïoh pynlong haduh 39 tylli ki jingïalehkai ha ka lympung ïalehkai 39th National Games, kaba la thmu ban pynlong naduh 10 haduh 30 tarik u Lber jong u snem ban wan.
Kine ki kynthup ïa ka Archery, Athletics, Aquatics, Badminton, Basketball, Boxing, Canoeing & Kayaking, Cycling, Fencing, Football, Golf, Gymnastics, Hockey, Handball, Judo, Kabaddi, Kho Kho, Karate, Lawn Bowl, Modern Pentathlon, Netball, Rowing, Rugby, Shooting, Squash, Sailing, Triathlon, Table Tennis, Tennis, Taekwondo, Volleyball, Weightlifting, Wrestling, Wushu, Yogasana, Arm Wrestling, Muay Thai, Sports Climbing bad ka Softball kaba dei tang ka jingpyni ïa kane ka jingïalehkai.
Haba ïakren bad ki nongthoh khubor ha ka sngi Palei, u Director ka tnat ïalehkai u Bah Alertson Nongbri u la pynpaw ba kane ka dang dei tang ka jingtyrwa bad ka rai ka shong ha ka Indian Olympic Association ba kan shim ïa ka rai kaba khatduh.
U la ïathuh ba ki jaka ïalehkai ki la long kiba biang naduh ka Jawaharlal Nehru Stadium ha Polo kaba la thmu ban pynlong ïa ka jingplie ïa katei ka lympung kaba heh jong ka ri, kumjuh ka Integrated Multipurpose Indoor Hall, ka High-Performance Sports Science Centre, ka SSA Stadium, ka Multipurpose Indoor Hall jong ka SAI Training Centre ha NEHU, ka madan ïalehkai tied Golf ha Golflink, ka Kiang Nangbah Stadium, Wahïajer Stadium, ka pung ha Umïam na ka bynta ka rowing, ka wah Umtham ha Ri Bhoi na ka bynta ka Canoe Slalom, Canoeing bad kiwei kiwei.
Ha kawei pat ka liang u Working President ka Meghalaya State Olympic Association u Bah John F. Kharshïing u la ïathuh ba ka Sorkar Jylla ka la thaw ïa ka Supervision and Monitoring Committee na ka bynta ban khmih bniah ïa ki jingpynkhreh ïa ka 39th National Games. U la ïathuh ba u Director ka tnat ïalehkai u la long u Chairman bad u Joint Secretary kum u Co-Chairman.
“Ka synjuk ka ju bishar bniah man ka por ïa ki jingpynkhreh bad ïa ka pisa ba la mang na ka bynta kane ka lympung la buddien da ka tnad ba dei khmih.
