Shillong, Naiwieng 06
u Justice (Retd.) B.D. Agarwa kum u Ombudsman jong ka Meghalaya Cricket Association (MCA), u la pynskhem ïa ka jingsospon ïa u Honorary Secretary Bah Rayonald Kharkamni tad haduh ban da kut ka samoi treikam jong ka Apex Council ba la jied, kaba ban kut noh ha u Nohprah 2028. U Bah Kharkamni u la shah bthah ban aiti noh baroh kynthup ïa kiei-kiei ba dei jong ka MCA, ki kot ki sla, ki rekord, ki tiar ki tar, bad ki digital password baroh.
Kane ka jingshah sospon ka mih nangne na ka jingshah ujor halor ka jingkynnoh ba don ka jingleh khlem akor ïa ki kynthei (sexual harassment) ba la ujor da ki ‘thei lehkai cricket lyngba ka email ba thikna jong ka MCA ha u Nohprah 2025. Ki jingïit bniah jong ka Meghalaya State Commission for Women (MSCW) ka la pyni ba u Bah Kharkamni u la buhrieh jubor ïa kine ki email, um shim la pynlong kano-kano ka jingtohkit, um shym la phah kano kano ka jingjubab, bad um shym la thaw ïa ka Internal Complaints Committee (ICC) kumba kadei ban don da ka kyndon POSH Act.
U President jong ka MCA, u James P.K. Sangma, u la sospon ïa u Bah Kharkamni ha ka 27 Jylliew 2026. U Bah Kharkamni u la pynpaw ïa ka jingkyntait ïa kane ka rai, hynrei ka Meghalaya High Court ka la kyntait kylla ïa ka jingkyrpad jong u ha ka 30 tarik Risaw, da kaba rai ba ka jingkam jong u President ka long kaba dei ban ïada ïa ki nongujor ryngkat ki sakhi pynshisha. Ka High Court ka la kyntait ruh ïa ka jingpyrshang u Bah Kharkamni ban pynkhyllem ïa u Ombudsman bad ka la hukum ïa ka MCA ban pynskhem ïa ki kyndon ban shakri ïa ka jingshngain ki thei ïalehkai hapoh 6 taiew.
“Ka jingshlur ki thei ïalehkai ka MCA ki la pyni da kaba wan lang bad pynsngew ïa kane ka kam ka long kaba dei ban pyntip,” la ong u Sangma. “Ka jingshlur ki thei ïalehkai jong ngi ka long ka khubor sha baroh ki kynthei ha ki tnat treikam baroh: wat shah ïa ka jingleh palat, wat sngap marwei. Kren bad pynpaw ïa ka!.”
U Sangma u la ong ba ka Seng “kan treikam ban pynskhem ba baroh ki kyndon ba donkam kin urlong, da kaba ai ka jingshngain bad ka jingburom ïa baroh ki nongïalehkai, khamtam ïa ki kynthei.”
Da kaba sot ïa ki jinglap ka MSCW bad ka High Court, u Ombudsman u la rai ba kam don kam shuh ban pynlong sa kawei pat ka jingbishar, da kaba pynpaw ba ka jingkyntait ban ïada ïa ka burom jong ki nongïalehkai ym lah ban pdiang. U Bah Kharkamni um shym la wan mih lane pynpaw jingïakren halor ki jingphah notice ba la phah da u Ombudsman ha u Naitung bad u Nailar.
Da kaba ïaroh ïa ki nongïalehkai ba ki la wan shakhmat, u President jong ka MCA u Sangma u la pynskhem pat ïa ka jingkut jingmut jong ka seng ban pynskhem ïa ka POSH bad pynthikna ka jingshngain ïa ki kynthei.
