Agartala, Naiwieng:
Ka Tripura State Election Commission ka la bthah ïa ka sorkar jylla ba kan pynbeit ïa ki 25 tylli ki kynhun jong ki pulit ka sorkar pdeng (CAPF) ban pynkhlaiñ ïa ka jingpahara ha shwa ka elekshon Urban Local Body ha ka 27 tarik u Naiwieng, ong u heh sorkar ha ka 16 tarik u Naiwieng.
Ka elekshon sha ki 16 tylli ki urban local bodies, ba kynthup ïa ka Agartala Municipal Corporation (AMC) kan long ha ka 27 tarik u Naiwieng, katba ka jingñiew vote pat la buh ban long ha ka 3 tarik u Nohprah. Ka BJP ka la dep ban jop 5 tylli na ki 21 tylli ki urban local bodies jong ka jylla khlem don ba ïaleh pyrshah.
“Hadien ka jingbishar bniah ïa ka jinglong jingman ka jingshngaiñ ha ka por ba dang ïaid shakhmat ka civic poll, ki bor pulit jong ka jylla ki la wad ïa ki 25 tylli ki kynhun jong ka CAPF ban pynthikna ïa ka jingpahara kaba biang na ka bynta ka elekshon. Katkum kane, ngi la phah ïa kane ka kam sha ka sorkar jylla ban rah sha ka Centre Commission”, la ong u State Election Commission Secretary u Anurag Sen ha ka jingïakren bad ki nongthoh khubor.
U Sen u la ong ba ka komishon ka kwah ban pynkhlaiñ ïa ka jingpahara ïa ka elekshon da ka jingpynjari ïa ki bor pdeng ban ïa kaba shaniah tang ha ki pulit ka jylla bad ki shipai Tripura State Rifles (TSR).
Ka komishon ka la buh por ruh ïa ka Election Duty Voting (EDV) khnang ba ki briew kiba trei ïa ki kam kiba ïadei bad ka elekshon kin lah ban pyndonkam ïa ka hok jong ki. Kane ka jaka kan kynthup ïa ki heh sorkar, ki pulit, ki TSR jawan bad ki nongtrei jong ki tnad sorkar bapher bapher kiba la aiti ban leh ïa ki kam elekshon. Ki nongshim dur bad ki nongñiah kali kiba trei ïa ki kam kiba ïadei bad ka elekshon ruh kin ïoh ban thep vote lyngba kane ka jingpynbeit.
U Sen u la ong ba la thung 18 ngut ki nongpeitkai ban peit ïa ka jingtreikam ha ka elekshon.
Ki mashin thep vote Electronic Voting Machine (EVM) yn pyndon kam khlem ki Voter Verifiable Paper Audit Trail (VVPAT) units ha ki civic poll, u la ong bad bynrap ba ki mashin kim ïahap satia bad ki VVPAT.
Ka jingpyntreikam ïa ki mashin EVM la buh ban long naduh ka 18 haduh ka 20 tarik u Naiwieng.
