Shah pyndam 15,302 tylli ki kyrteng jong ki nongthep vote ha Changlang

Itanagar, Naiwieng: Ka Changlang distrik Unit jong ka seng BJP ha Arunachal Pradesh, ka la pdiang sngewbha ïa ka Special Intensive Revision (SIR) ïa ka thup kyrteng jong ki nongthep vote, wat haba katei ka...

Itanagar, Naiwieng:

Ka Changlang distrik Unit jong ka seng BJP ha Arunachal Pradesh, ka la pdiang sngewbha ïa ka Special Intensive Revision (SIR) ïa ka thup kyrteng jong ki nongthep vote, wat haba katei ka jingpyntreikam, ka la wanrah ïa ka jingpyndam ïa palat 15 hajar ngut ki nongthep vote, na ka thup kyrteng jong ka distrik.

Ha ka jingïalang bad ki nongthoh khubor ha Changlang, u President ka BJP ha ka distrik u Roshan Ngemu bad u nongaiktien jong ka tnat treikam jong ka jylla u Tobom Dai ki la kyrshan ïa ka jingpynkhreh SIR 2026 kaba la pynlong da ka Ophis jong u Chief Electoral Officer (CEO), Arunachal Pradesh.

Katkum ki jingkheiñ ba la ïasam lang, ki nongthep vote jong ka district Changlang ki la hiar na ka 71,665 ngut sha ka 56,363 ngut hadien ka jingpynkylla, kaba pyni ba ka la hiar kumba 21 per cent.

U Dai u la kren ruh halor ka jingkulmar ha Bordumsa ha ka jingbishar ïa ki jingdawa bad jingpyrshah jong ka SIR ha u bnai Nailur. Ki jingïakhih bad ki jingïaleh ki la mih hapdeng ki jingkynnoh kiba ïadei bad ka jingpynrung ïa ki dkhot jong ka jaitbynriew Chakma ha ka thup nongthep vote.

Katei ka jingkulmar, ka la ktah ïa ka All Arunachal Pradesh Students’ Union (AAPSU), bad la ïathuh ba ka la wanrah ïa ka jingjulor jong ka ophis jong u Electoral Registration Officer bad ka jingsangeh shipor ïa ki jingbishar.

Hadien kata, u Myntri Rangbah ka jylla u Pema Khandu u la kyrpad ïa ki seng samla pule bad kiwei kiwei ki kynhun ban bud ïa ki rukom treikam aiñ ba la buh katba u dang pynpaw ïa ka jingpyrshah ïa ka thup kyrteng thep vote.

Ka por ba pura ban thep ïa ki jingdawa bad ki jingpyrshah lyngba ka phorm 6 ha ka por ba pyntreikam ïa ka SIR ka la sdang naduh ka 21 tarik u Naieung haduh ka 18 tarik u Nailur, 2026.