Kohima, Naiwieng:
Hadien 187 sngi ha ka jaka tep metïap jong ka Jawaharlal Nehru Institute of Medical Sciences (JNIMS), ïa ka met ïap jong ki 6 ngut ki Naga, kiba la shah pynshisha ba ki la shah rahbor bad shah pynïap ha Manipur, ha Kangpokpi distrik, la tep noh ha ka Naga Martyrs’ Park ha Konsakhul ha ka 16 tarik, Naiwieng.
Ka jingleit ontep, kaba la pynlong hapoh ka lama “Ka Jingrakhe ïa ka jingim jong ki hynriew ngut ki Martyr Naga”, ka dei ka jingwan phai sha la ïing bad ka jingleit phai kaba khatduh jong ki hynriew ngut kiba la shah pynïap. Ka jingïalang kaba heh jong ki paidbah na ki jaitbynriew trai ri trai muluk bapher bapher, kynthup ïa ki Naga, ki Meitei bad ki Meitei Pangal, ki la wan ban ïashim bynta ha katei ka sngi.
Ïa kine ki metïap la pdiang da ki nongshong shnong bad ki seng bhalang hadien ba la wanrah na ka jaka buh metïap jong ka JNIMS. Ha kane ka jinglehniam la don ruh ka jingbuh syntiew bad ka jingai syntiew ïa kiba la khlad noh.
Napdeng kiba la don lang ki long ki MLA Leishiyo Keishing, Awangbou Newmai, Tongbram Robindro Singh, Sanasam Premchandra Singh, Janghemlung Panmei bad Kasim Vashum ha ryngkat u MP barim u Lorho Pfoze.
U Co-convenor jong ka Joint Tribe Council Manipur (JTCM) u Savio u la ong ba ka rai ban dawa ïa ki metïap ka long hadien ba la pyndep shi bynta ïa ka riti jingdawa ba la aiti da ka United Naga Council bad ka JTCM.


