Manila, Naiwieng:
U Myntri Rangbahduh ka India, u Narendra Modi, haba ai jingkren sha ki nongialam ka pyrthei hapoh ka jingialang ASEAN, u la ong ba ka India bad ka ASEAN ryngkat ki mihkhmat ïa jan shi bynta na ka saw bynta jong ka jingbun briew ha ka pyrthei, bad ïa ka lawei ba ïatylli jongki, dei ban pynwandur da ka “jingïatreilang, ym da ka jingïakhun.” U PM Modi, haba kren ha ka jingialang jong ka ASEAN-India, u la ong ba ka jingshimkhia jong ka New Delhi ïa ka jingïatylli jong ka kynhun bad ka jinglong pdeng ha ka jingïatreilang “ka long bad kan iai neh.”
“Ha kine ki khyndiat snem ba la dep, ka pyrthei ka la mad ïa ki jingeh kiba bun jait. Kaei kaba ka pyrthei ka donkam bha mynta ka long ka jingsuk, ka jingshong suk shongsaiñ, bad ka jinglah ban tip lypa,” u la ong.
“Ha kane ka jinglong jingman, ka phang pdeng jong ngi mynta u snem, ‘Ka Jingïaid lynti ïa ka Lawei jong Ngi, Ryngkat’, ka don ka jingmut kaba kyrpang,” ong u myntri rangbahduh ha ka jingïalang ha kane ka nongbah Philippines.
Ia ka seng jong ki ri jong ka thain shatei lam mihngi (ASEAN) la shim ba ka dei kawei na ki kynhun kaba donbor tam ha kane ka thain. Ka India bad katto katne kiwei pat ki ri kiba kynthup ïa ka US, China, Japan bad Australia ki dei ki paralok ïakren jong ka.
“Ka India bad ka ASEAN ryngkat ki mihkhmat haduh shi bynta na ka saw bynta jong ka jingbun briew ha ka pyrthei. Kumta, ka long kaba donkam ban pynthikna ba ka lawei jong ngi kan long kaba la pynbeit da ka jingïatreilang, ym da ka jingïakhun,” ong u PM Modi.
U PM Modi u la ong ba ka India bad ka ASEAN ki don baroh ar ka bor bad ka jingkut jingmut bad ryngkat, baroh arliang ki lah ban pynlong ïa kane ka thain kum ka dak jong ka jingshongsuk shongsain.
“Ngi ngeit ba ka roi ka par jong ka India bad ka roi ka par jong ka ASEAN ki ïasnoh bha. Ha ki snem ban wan, ka ASEAN Community Vision 2045 bad Developed India 2047 ki lah ban don ka bynta kaba kongsan ha kaba pynurlong ïa ki jingangnud ba ïasam lang jong ngi.,” u la ong.
U myntri rangbahduh u la ong ba baroh arliang mamla ki la ai jingkyrmen thymmai ïa ka jingiatreilang ha kine ki 12 snem ba la dep bad “ngi dei ban thaw dur ïa ka lawei jong ka thain jong ngi” mynta. “Ka jingkular jong ka India ïa ka jingiatylli bad ka jinglong pdeng jong ka ASEAN ha kane ka jingiatreilang ka long bad kan dang neh.”
“Nga ngeit skhem ba ka jingialang mynta ka sngi kan kyntiew ïa ka jingiatreilang ba pura jong ngi sha ki kyrdan ba thymmai bad kan noh synniang ban tei ïa ka Indo-Pacific kaba shngain, kaba kynthup lang, bad kaba roi,” u la ong.
Ka dei ka jingïakren kaba 13 jong u PM Modi bad ki nongïalam jong ka ASEAN ha kane ka rukom.
