Shillong, Jylliew:
Ka National People’s Party (NPP) Shillong City Unit kan ïasnoh kti lang bad ka Federation of Shillong Hotels (FSH) na bynta ka ‘World Tourism Day’ kaba ju rakhe ha ka 27 tarik u Nailur man u snem.
Ka NPP Shillong City Unit ha ryngkat ka Federation of Shillong Hotels ka khmih lynti ba bun tylli ki ‘Hotel’ bad ki jaka bam kin lah ban pynlong ïa ka jinglong-jingman mariang hapoh ka Jylla kaba juh khnang ban kyntiew ïa ka ‘Eco-Tourism’.
Ka seng ka la ong ruh ba ka sngew sarong ba ka Jylla ka la shah jied kum kawei na ki jaka kaba biang tam eh na bynta ki ‘riew rangbah bad ka ban sah kynmaw kum ka jaka hapoh ka ri ban wan shangkai pyngngad.
“Hynrei ka dei ka jingpyrshang jong ngi ban pynlong ïa ka Meghalaya kum ka Jylla kaba paka tam ha ka liang ki kam jngoh kai na bynta baroh ki nongwan jngoh kai la ka long ha ka rta ne kyrdan,” la ong u Working President ka NPP Shillong City, Bah Manroi Bha Kharpuri.
U Bah Kharpuri u ka ong ruh ba ka tnad ka tip shai ba ka long kaba donkam ban pynneh-pynsah ïa ki kam jngoh kai khnang ban ïada ïa ki jaka jngoh kai paidbah.
U la ong ruh ba ka NPP Unit ka la ïasnoh kti lang bad ka Federation of Shillong Hotels bad kynthup ruh ïa 3 tylli ki rai ha ka sngi rakhe ïa ka ‘World Environment Day’ ka ban long ha ka 5 tarik mynta u bnai.
Ka NPP Unit ha ryngkat ka Federation ha ka jingïalang bad u Assistant Commissioner – Food Safety, ka Sorkar Jylla, ka la kyrpad ïa baroh ki Hotel/Guest House bad jaka bam ban pynkhuid ïa ka mariang da ki sienjam barit ha katei ka jingrakhe.
Namar katei, ka jingïalang ka la buh ruh ki jingtyrwa ban kyrpad sha baroh ki ‘Hotel’, jaka bam ban kiar na ka jingpyndonkam ïa ki bilor plastik bad la ai jingmut ba ki pynbiang ïa ka umdih kaba khuid ha ki bilor.
Ha kajuh ka por, yn shna ïa ka ‘Sticker’ bad tah hapoh ki ‘tourist taxi’ ban khang lad ïa ki nongleit-nongwan ban pynjaboh ïa ki jaka paidbah bad ban batai sha ki ha kano ka rukom ban bret ïa ki jaboh haba bam jingbam hapoh kali.
Shuh shuh yn sa kynjoh ruh sha u District Transport Officer (DTO) khnang ban kyntu ïa baroh ki ‘tourist taxi’ ban buh lang ïa ki jaka theh ñiut kiba rit hapoh kali.
Nalor kane, la kyrpad ïa baroh ki ‘Hotel’, jaka bam ban thung iwei i tynrai dieng ha ka 5 tarik mynta u bnai.
