Shillong, Jylliew 28
Ki samla pule ka Khadsawphra College kaba don ha Mairang, Eastern West Khasi Hills District ryngkat bad ka tnad Pulit Mairang ki la rakhe ïa ka World International Anti-drug abuse and Illicit trafficking ha ka 26 tarik mynta u bnai Jylliew 2026..
Ha kane ka sngi na ka liang ka tnad pulit la wan mihkhmat da ka Kong B. Nongrang kaba dei ka SI bad ai jinghikai shaphang ka jingsniew na ka jingdih drok, kumno ka ktah ïa ka koit ka khiah jong baroh kiba pyndonkam ïa une u jingdih ba pynbuaid bad kumno ruh ka ktah ïa ka imlang ka sahlang.
U Babu Boldness Nongum uba dei u Principal ka college u la ban jur kumba kane ka college ka dei ka “free tobacco institution” kan ïai ïakhun ban rat dyngkhong ïa une u jingdih uba la sdang jyllei wat shaduh ki thaiñ nongkyndong.
Hadien ba la pynsngewthuh paidbah ban kiar na une u jingdih kiba ki samla ki la pyndonkam bakla ïa u kat haduh ba u la pynjot ïa ka long rynieng jong ki bad kumno ka la ktah ïa ki longïing longsem bad ïa ka ri bad ka jaidbynriew, la pynlong ka jingïaid paidbah pyrshah drok ha shi lynter ka lynti ka shnong Lumsohkhlur bad Mission Mairang hapoh ka jingïalam ki volunteer jong ka NSS unit jong kane ka college.
U Principal bad ka Kong Lasiewdor NSS Prokram officer jong ka college ki la ai khublei ïa ki pulit kiba la ïatrei ryngkat bad ka college ha kane ka sngi pyrshah drok.
