Shillong, Jylliew 28
Ka nongrwai hindi ka Jasleen Royal ka la pyllait ïa ka jingrwai kaba ai kyrteng “Inaam” ha youtube ha kaba ïa ki durkhih jong kane ka jingrwai la thep ha ka por ba ka rwai ha ka tamasa Cherry Blossom kaba long ha madan Polo, Shillong mynshem snem.
Ïa kane ka jingrwai Inaam, ka Jasleen ka la rwai lang bad u Badshah kaba la pyllait ha ka 18 tarik Jylliew 2026 ha youtube channel kaba ai kyrteng Jasleen Royal ha kaba palat ar lak khadhynriew hajar ngut tam kiba peit ha kine ki shi taiew tam.
Na ka liang u Myntri Rangbah ka jylla u Conrad K Sangma u la ai khublei ïa ka Jasleen Royal kaba la long kawei napdeng ki kynthei kaba dei ka nongrwai bad nongthaw jingrwai kaba don lai tylli jingrwai ha ka thup India’s Top-150 bad ka Inaam ka don ha ka top-15.
U la ai jingïaroh ïa ka jingitynnad ka durkhih namar ba la pynrung ïa ka tamasa Cherry Blossom kaba pyni ïa ka jingitynnad ka Meghalaya bad ki kam jngohkai pyrthei.
Ha kane ka durkhih ka Jasleen ka la pyni ba ka rwai ha rynsan ka tamasa Cherry Blossom kaba la pyni ruh ïa ki paidbah kiba la shad bad kaba kham itynnad ka dei ba la ring da u ‘drone’ ban pyni ïa ka jingbun briew kiba wan ha kane ka tamasa.
Na ka liang ka Jasleen ka la ai khublei kyrpang ïa ka Cherry Blossom Festival bad Meghalaya Tourism kiba la ai jingkyrshan ïa ka.
Da ka jingpyllait ka Jasleen ïa ka music video Inaam kaba la pyni ïa ka jingbun briew ha ka tamasa Cherry blossom, kan dang khring shuh shuh ïa ki samla na kylleng ki jylla ban wan lada pynlong biang ïa kane ka juh ka tamasa ha Shillong.
Ka jingmut Inaam ka long ka khusnam namar ka nongrwai ka thew ïa u baieid uba la pyllait ïa ka na ka jingïakynduh jingeh.
