Shillong, Jylliew 27
Ka jingpynleit jingmut, ka jingtrei shitom bad ka jingïaishah ha ka kam ka ïalam sha ka lynti ban kiew ha ka sap ka phong lane ban jop ha ka jingim, lah ban ong ba u samla Erick Ïawphniaw u dei uwei na ki samla ba la lah ban jop ïa kine.
U samla Erick u dei uba shong ba sah ha ka shnong Umbang-Summer Ri-Bhoi District bad u la pyndep ïa ki jingshah hikai pyntbit ha ka kam shet jingshet na Club Tropical 24×, na O, Coqueiro Hotel bad na Spice N Buns ba na Goa, namar ka jingpynleit jingmut bad ïaishah jong u, u la kiew suki-suki ha ka kam, ha kaba mynta u la lah ban seng ki dukan bam lajong haduh ar tylli ha Ri-Bhoi District, kata ka dei kaba u la ai kyrteng ka Wansuk Leitsuk-1 kaba don ha Mawpun Kshaid lynti ban leit sha Umroi bad ka Wansuk Leitsuk-2 kaba don ha Umbang-Summer marsyndah ka Pine Brook School.
Haba ïoh ban ïakren ha ka dukan ba u dang shu plie thymmai u la ïathuh ba ha katei ka dukan u long trai hi ha kajuh ka por u long nongshet hi bad ha katei ka dukan lah ban ïoh ka rukum shet Indian, Chinese, Tandoori, Goan bad kiwei-kiwei.
U Samla Erick u la ai mynsiem ïa kiwei de ki khun samla ba kin trei hok, trei shitom bad ban long kiba ïaishah haba trei ïa kano-kano ka kam bad u la ong, “Wat nym ïa beh ïa ka pisa, ai ba ka pisa kan beh ïa phi, trei shitom pynleit jingmut ban long kiba tbit ha ka kam, ynda phi la tbit ha ka kam, phi lah ban seng la ka jong ka kam bad ka kam jong phi ruh kan ïaid beit kumjuh ka pisa kan sa wan beit hadien.”
Kane ka Sngi Saitjaiñ ka dei ka sngi ba la plie ïa ka dukan thymmai ka Wansuk-Leitsuk-2 bad la wan ban kyrkhu kyrdoh bad kitbok kitrwiang da u Fr. Khating u ba long u Asst Parish Priest Umbir ha ryngkat ki bahaïing hasem bad kiba ïajan jong u.
