Shillong, Jylliew 28
U nongïalam ka UDP bad MLA ka Khliehriat, Bah Kyrmen Shylla ha ka Sngi Thohdieng u la ong ba man la u nongthep ‘vote’, khlem da kheiñ ïa ka rta, u don ïa ka bynta kaba kongsan ha ki ilekshon.
Ha kajuh ka por, u la kubur ba ka jingbun ha ka jingdon jong ki samla ha kawei ka liang ka la nang ai mynsiem shuh-shuh ïa ki haba ïadei bad kane ka bynta.
Haba jubab ïa ki jingkylli halor ka bynta jong ki samla ba la ïoh ban thep ‘vote’, u Bah Kyrmen u la ong ba ïa ki ilekshon ym lah ban peit tang lyngba ka ïitkhmih jong kawei ka bynta jong ka jingbun briew.
“Haba ïadei bad ki ilekshon, uwei-pa-uwei u nongthep ‘vote’ u don ka bynta kaba kongsan. Ngim lah ban shu kheiñ tang ïa ki samla ne tang ïa kiba la tymmen. Baroh kiba don ïa ka ‘vote’, ki don ïa ka bynta ba kongsan,” u la ong.
U Bah Kyrmen u la ban jur ba baroh ki nongshong shnong kiba la palat 18 snem ka rta ki don ïa ka hok ban thep ‘vote’ bad ki long kiba kongsan kumjuh ha ka ban jied ïa ki nongmihkhmat.
U la bynrap ba watla ka jingdon ki samla ka kham bun ha Meghalaya bad ha ka ri baroh kawei, kata kam pyntlot pat ïa ka jingkordor jong kiwei pat ki nongthep ‘vote’.
“Baroh ki long kiba kongsan mar katjuh. Hynrei namarba ki kham bun ha ka jingbun briew, hooid, ka jingmut-jingpyrkhat jong ki samla – kaei-kaei kaba ki don ha ka jingmut-jingpyrkhat – ka long kaba kit jingmut bad kan synñiang ha ka jingjied ïa ki nongmihkhmat. Ka jingnoh synñiang jong ki kan long kaba khraw bha,” u la ong.
U MLA u la ong ruh ba ka jinglong kongsan jong ka bynta ki samla kam dei tang ha ka ilekshon ban wan ha u 2028.
“Ym tang ha u snem 2028, ha man la ka ilekshon, ki samla kin synñiang beit shi kat dei bad wanrah ïa ka jingktah kaba khraw,” u la bynrap.
