Shillong, Jylliew 06:
Ki nongñiah kali kamai hapoh ka shatri jong ka East Khasi Hills Local Taxi Welfare Association (EKHLTWA) ki la pynpaw ka jingsngewsih kthang hadien ka jingshah kynthoh ha u Myntri ka Sorkar Jylla, Bah Paul Lyngdoh ha ka Lah Sngi U Blei.
“Ka jingkren jong u Bah Lyngdoh kum uwei na ki ’riew rangbah uba la bat teng kum u nongïalam seng ba ki nongñiah kali kamai kim don hok, ne kim don lad shuh ban ïoh kam ïoh jam ha kane ka bhah thung kam (Reservation Policy), nga sngew ban ong ïa u, tharai u don na ka mynsiem shisha ne dei ba shu phloit ne btuid na u thylliej,” la ong uwei u nongñiah kali kamai ha ka Sngi Ba-ar.
U la ong ruh ba katei ka jingkren jong u Myntri ka la pynsngewsih shi kat dei ïa ki nongñiah kali kamai hadien ba u la pynmih ïa kitei ki kyntien.
“Ka long kumba thew beit ïa ngi ki nongñiah kali ba ngim lah shuh ban leh eiei bad ngin shu ñiah kali sah baroh shi lynter. Hynrei kiba bun hi na kiba ñiah kali kamai ki dei kiba la nang la stad,” u la ong.
Ha kawei ka liang, u la ong ba wat la ma u shimet un ym donkam shuh ïa ka bhah thung kam khamtam ba la palat ka rta, hynrei u pyrkhat pat na bynta ki khun ki kti, ki bahaïing ha sem kiba dang leit pule.
“Nga kwah ba un pynshai kum u ’riew rangbah halor kane ka bynta balei u ibeiñ ïa ngi kum ki nongñiah kali,” la ong utei u nongñiah kali.
Sa uwei pat u nongñiah kali kamai haba kren halor katei ka bynta, u la u ong,
“Kum u ’riew rangbah uba la nang la stad, u MLA uba la shah jied sha ka ïingdorbar thawaiñ hynrei ban shu kren kumto ïa ngi ki nongñiah kali kamai…u shim beit ba ngi dei kiba biej, kiba tasngeng, ki bym tip ïa u ‘A’ u ‘B’, hynrei ynda phi la pyrkhat bha, ngi ki nongñiah kali ngi long kiba stad namar ngi sngewthuh ïa la ka kamram.”
Ha kajuh ka por, u la ong ba ka jingkren jong u Bah Lyngdoh ka la pynmong bad pynkthang shi kat dei ïa ki nongñiah kali kamai.
“Ngi pynrem jur ïa ka jingkren laplah u Bah Lyngdoh,” u la ong.
U la kdew ruh ba kiba bun ki nongñiah kali kamai ki dei kiba shu ñiah kali shi por bad kam dei satia ba ki shim ïa kane ka kam kum ka lawei jong ki.
“Ki bun kiba la nang la stad bad kim pat ïoh kam ïoh jam hynrei ki kyrshan ïa ka ïing ka sem da kaba ñiah taksi ryngkat ka jingthep kam shane-shatai,” u la ong.
Shuh shuh u la bynrap ba ka jingleit jong ki nongñiah kali kamai ha ka jaka shah thngan u Bah Ardent M. Basaïawmoit ka long ban leit ai mynsiem ïa u namar ki pyrkhat ïa ki khun ki kti, ka lawei, ka pateng jong ki khnang ban suk ha ka liang ka kam ka jam.
