Shillong, Jylliew 06:
Ki ar tylli ki seng jong ki nonghikai hapoh East Jaiñtia Hills ba kynthup ïa ka Jaiñtia Hills Lower Primary School Teachers Association (JHLPSTA), Khliehriat Unit bad ka Meghalaya SSA School Association (MSSASA), East Jaiñtia Hills District Unit ki la rai ban sangeh pyndonkam noh shi syndon ïa ki 2 tylli ki ‘App’ ba la pyntreikam da ka shlem treikam Sub-Divisional School Education Officer (SDSEO), EJH, bad District Mission Coordinator (DMC) haba ïadei bad ka jingkyntiew kyrteng ïa ki nonghikai ha ka por ba ki wan sha skul.
Kitei ki ‘App’ ki kynthup ïa ka ‘GPS Map Camera App’ bad ka ‘Ubiattendance App’.
“Ngi la wan ïakynduh bad ai jingthoh ïa ka SDSEO hadien ba la ïoh jingujor na ki nonghikai halor kitei ar tylli ki ‘App’ ba la pyntreikam hapoh ka distrik na bynta ki nonghikai skul SSA, Sorkar, bym dei Sorkar, ‘Deficit’ bad ‘Adhoc’ kiba hikai ha ka kyrdan ‘Elementary’,” la ong u President ka MSSASA, EJHDU, Bah Aristotle C. Rymbai.
U la ong ba kawei na ki jingeh ba ki nonghikai ki la pynpaw ka long ba na ka liang ka ophis (SDSEO) ka la pynrung kyrteng bad sam ïa ki jingtip shimet jong ki nonghikai hapoh ka ‘Ubiattendance App’ khlem da ïoh jingbit na ki.
“Kane ka long kawei na ki bynta kaba ka ophis ka la pynkheiñ ïa ka ‘Right to Privacy’ jong ngi ki nonghikai katkum ka Article 21 jong ka Riti Synshar ka Ri,” la ong u Bah Rymbai.
Haba kdew ba bun na ki nonghikai ki dang pyndonkam ïa ki ‘mobile’ kiba rim, u la ong ban ‘download’ ïa kane ka ‘App’ donkam ïa ka ‘Smart Phone’ bad kane ka buh jingeh shi kat dei ïa ki nonghikai, ha kawei ka liang kaba la pynsheptieng ruh ïa ki naba ki la ïoh jingmaham na ophis ba lada kim pyntreikam ïa katei ka ‘App’, ki lah ban shah set tulop bad wat ban shah beh kam ruh.
Ha kajuh ka por, u la ong ba ki nonghikai ki la pynpaw ka jingeh halor ka jingbym biang ‘network’ khamtam ha ki jaka nongkyndong kum ha Huroi, Borghat, Saipung bad kiwei-kiwei ki bynta hapoh EJH.
Na ka liang u Bah Rymbai u la pynpaw ruh ka jingsngewkhia namar la pyntreikam ïa katei ka ‘App’ khlem da khot ïakren ïa ki nonghikai kiba don hapoh ka distrik bad la shu pyntreikam beit mardor ïa ka.
“I kumba ki shu leh da ka bor bad ki shu khñiot beiñ ïa ngi ki nonghikai ban pyntreikam ïa kane ka ‘App’,” u la ong da kaba bynrap ba bun ki nonghikai kim da tip bha halor ki kor ka juk stad teknoliji ba mynta bad ym shym la ai jinghikai sha ki hashuwa, hynrei la shu phah beit da ka ‘link’ bad phah ‘download’ kumjuh ban kyntiew kyrteng ïa ka jingwan skul jong ki ha ka por mynstep bad ynda la wai skul.
Haba pynsngew ba ïa katei ka ‘App’ la pyntreikam tang hapoh EJH, utei u nongïalam u la pynpaw ka jinglyngngoh ba watla ka Sorkar ka la pynmih ïa kawei ka ‘App’ ba la tip kum ka ‘MEG-TIMS’ la pynmih pat sa ïa kitei ki 2 tylli kiwei pat.
Kumta na ka liang ki ar seng hadien ka jingïalang ba kyrkieh kaba la long ha ka Lah Sngi U Blei, ki la rai ban leit buh da ka jingthoh kumjuh ban ïakynduh ïa ka SDSEO bad u DMC halor katei ka bynta.
“Ha ka jingïakynduh bad ka SDSEO, ka la pynpaw ba ïa mynta kam lah ban ai jubab halor kane bad ka la pan por ba kan shong jingïalang bad ki para nongtrei kynthup ïa u DMC, BMC bad hadien kata, kan sa pyntip bad khot ïa ngi sha ka jingïakren,” ong u President.
Shuh shuh u la bynrap ba ka jingïalang ka la rai ruh ba kat bym pat lah ban ïakren pynbeit halor katei ka jingeh ki nonghikai, naduh mynta ka sngi (ka sngi ba wan ai jingthoh), baroh ki nonghikai (SSA, Sorkar, bym dei Sorkar, ‘Deficit’, ‘Adhoc’) hapoh ka distrik kin sangeh shi syndon ban pyndonkam ïa kitei ki 2 tylli ‘App’.
