Shillong, Jylliew 06:
Wat la u Myntri ka tnat Shangkai Pyrthei ka Sorkar Jylla bad uba dei ruh u MLA ka UDP na West Shillong konstitwensi, Bah Paul Lyngdoh u la ai ka jingkynthoh ïa u President ka VPP, Bah Ardent M Basaïawmoit halor ka jingdawa pynkylla ïa ka bhah thung kam thung jam, hynrei u General Secretary ka Voice of the People Party (VPP) u Dr. Ricky A.J. Syngkon u la ong ba ka seng kan nym ai kano-kano ka jingkynthoh.
Haba ïakren bad u Dr. Syngkon u la ong ba ka seng VPP kam kwah ban ai kano-kano ka jingkynthoh halor ka jingkren u Bah Paul Lyngdoh.
U la ong ki nongkitkam ka seng VPP ki dang bunkam ban leit pynrung dkhot sha man ki konstitwensi.
Ha kawei pat ka liang u la pynpaw ka jingsngewkmen ba u Bah Ardent Basaïawmoit uba dei u President ka VPP u la don ha ka met kaba shait kaba khlaiñ.
Haba ïakren bad u Dr. Batskhem Myrboh uba dei u nongaiktien jong ka VPP, u la ong ba ka seng kam kwah ban kynthoh eiei halor ka jingkren u Bah Paul Lyngdoh.
Nangta u la ong ba ka seng ka la dep pynshai ha kine ki sngi sha ki paidbah bad haduh ban da shah thngan u President ka VPP, Bah Ardent Basaïawmoit bad mynta u sngew ba kim donkam shuh ban pynshai biang.
