Shillong, Jylliew 07:
Hadien 6 bnai ba ka la jah na la ïing na nongbah Shillong, ki pulit ki la lap bad ïoh pyllait noh ïa kane ka samla na kawei ka shnong kaba don hapoh ka jylla Bihar.
Ki pulit ka East Khasi Hills ki la pyntip ba kawei ka samla kaba la tip kyrteng kum ka Sonali Kumari, 17 snem ka rta, kaba la jah naduh ka 21 tarik Nohprah, 2022, la ïoh ban pyllait na ka shnong Bidupur kaba ha Vishali district ha Bihar ha ka 6 tarik mynta u bnai.
Kat kum ka khubor ba la pyllait da u Superintendent of Police, East Khasi Hills district, Bah S Nongtnger, u kpa jong ka Sonali u Ram Sogarath Singh, uba shong ba sah ha DPI compound, Crinoline Swimming Pool Road, Shillong u la ujor ejahar ha thanad Laban hadien ba ka Sonali ka la jah na la ïing. Kumat na ka liang ki pulit hadien ka jingujor ki la pynlong ka jingwad ban lapdien ïa kane ka samla.
Ka kyrwoh khubor na u SP ka la ong ba hadien ka jingbteng jong ka jingwad dien ïa kane ka samla ba jah, bad hadien ka jingïoh ki sakhi halor kane, ka kynhun ki pulit na East Khasi Hills district hapoh ka jingïalam jong u Inspector KP Singh, uba dei u OC ka thanad Laitumkhrah ki la hiar sha Bihar ban wad ïa kane ka samla bad lap na ka shnong Bidupur.
