Khliehriat, Jylliew 08:
Hadien ba ki nongri masi ki la shah ktah na ka jingwan lynshop ka jingpang masi ba tip kum ka jingpang Lumpy Skin Disease, ka Jaiñtia Students’ Movement (JSM) Eastern Region (JSM-ER) East Jaiñtia Hills District ki la ai da ka jingthoh sha ka shlem treikam Animal Husbandry and Veterinary, East Jaiñtia Hills District ha ka sngi Palei.
Kat kum ka jingïathuh ka JSM, ki shnong kiba shah ktah ha kane ka jingpang masi ki long ka Pamrakmai, Pamrapaithlu, Wapung Shnong, Sohkymphor, Byrwai Iongkaluh, Suchen, Iapmala, Byndihati, Lumshnong, Cham Cham bad kiwei kiwei ki shnong hapoh ka distrik.
Ka JSM ha ka jingïakynduh bad ka Senior Animal Husbandry & Veterinary Officer, East Jaiñtia Hills District, Khliehriat ka la dawa ban buh noh da u Help-Line Number hapoh ka distrik khnang ban pynsuk ïa ki nongri jingri kiba shah ktah ban pan jingïarap bad jingïada ba kyrkieh na kane ka tnat.
Ka Senior Animal Husbandry & Veterinary Officer, East Jaiñtia Hills District, Khliehriat ka la ong ba na ka liang ka tnat ka la shimkhia halor kane ka jingpang masi da kaba ki nongtrei jong kane ka tnat ki la leit ai tika, injection bad Awareness Program sha ki nongri masi jong ki shnong hapoh ka distrik.
Ha katei ka jingleit ïakynduh la ïalam da u President Wellson Siangshai, Donkupar Roy Kharkrang Vice President bad kiwei kiwei ki dkhot jong ka seng.
