Shillong, Naitung 12
U Chief Executive Member (CEM) ka Khasi Hills Autonomous District Council (KHADC) Bah Winston Tony Lyngdoh haduh mynta um pat phah ïa ka kyrteng u Executive Member ba thymmai sha u Lat ka Jylla hadien ba kane ka shuki ka la thylli mynta la lai taïew naduh ba la hiar shuki u Bah Pynkhrawboklin Kharjahrin uba dei u MDC ka VPP na Mawkyrwat constituency.
Katkum ki khubor ba la ïoh lum la ïathuh ba ka jingslem u CEM ban phah sha u Lat ka Jylla ka dei namar u hap ap ïa ka kyrteng ban sa phah da ka State Executive Committee jong ka Voice of the People Party (VPP) ka bym pat phah ïa ka kyrteng jong u MDC ban shimti ïa ka kam EM.
Ki khubor ki ïathuh ba ka jingslem ka SEC ban phah ïa ka kyrteng namar kim kwah ban rai kyrkieh ban mih bujli ha jaka u Bah Pynkhraw namar ki kwah ban da bishar bha ïa uno u MDC uba bit ban bat kum u EM.
Shuh shuh la ïathuh ba ka SEC ynda ka la dep jied ïa ka kyrteng jong u EM bad kan sa khot ïa ki MDC ban pan jingmynjur hashwa ban phah sha u Lat ka Jylla.
Kumban shu pynkynmaw u Lat ka Jylla u la pdiang ïa ka shithi haba hiar shuki u Bah Pynkhraw kum u EM ka dei ha ka 19 tarik Jylliew 2026 kaba dei ka sngi ba kut ka dorbar mangtyngka jong ka KHADC.
Kane ka jinghiar shuki u Bah Pynkhraw la ïoh jingtip la kham slem hynrei kam shym la paw pyrthei hynrei ka la paw pyrthei tad ynda u Lat ka Jylla u la pdiang ïa ka shithi.
U Bah Pynkhrawboklin Kharjahrin u dei u EM uba peit ïa ka Council Building, Council Asset bad Building by-laws hynrei naduh ba hiar shuki, kitei ki tnad treikam ki la sah tylli.
Haduh mynta ym pat tip na kaei ka daw ba u Bah Pynkhrawboklin u hiar shuki namar ïa kane ka shuki u dang bat kumba shisnem tam eiei naduh ba la shimti ka VPP ban synshar ïa ka KHADC.
