Shillong, Naitung 12
Ki nongïalam ka Jaiñtia Coal Miners & Dealers Association (JCMDA), ha ka 11 tarik u Naitung, 2026, ki la pynlong ïa ka jingïalang ban ïamir jingmut halor ka kam tih dewïong halor ka phang “U dewïong u long ka pliang ja jong ngi”, kawei ka sur, kawei ka jingmut, kawei ka lynti, da ka jingïatylli ngin jop,” ha Community Hall ka Khliehriat West, East Jaiñtia Hills District.
Ha kane ka jingïalang, la wan ban ïashim bynta da u Bah Kyrmen Shylla, MLA ka Khliehriat Konstitwensi, ka Kong Santa Mary Shylla, MLA ka Sutnga Saipung Konstitwensi, ki MDC ka JHADC, ki nongkitkam ka JCMDA, JNC nalor kiwei-kiwei pat.
Haba kren ha ka jingïalang, ka Kong Santa Mary Shylla, ka la pynsngew halor ka jingïakynduh jong ka bad u Myntri ka Sorkar India halor ka kam tih dewïong ha katei ka thaiñ, da kaba pyntip ba ka jingïakren ka long kaba seisoh.
Nalor kata, ka la ong ban leh ïa ka Open Cast Mining ha katei ka thaiñ, kan long kaba jynjar namar ka lah ban ktah ïa ka mariang bad kumta ka khmih lynti ba da ka jingïatreilang bad u MLA ka Khliehriat, kin lah ban wanrah ïa ki lad ki lynti, ban sdang biang ïa katei ka kam ha katei ka thaiñ.
Na ka liang u Bah Kyrmen Shylla, u la ong ba haba pyndonkam ïa ki mar poh khyndew, kaba kongsan ka long ban pynbha biang ïa ka mariang, da kaba thung dieng nalor kiwei-kiwei pat.
U la kyntu ruh ïa ki nongshong shnong, ba kin long kiba ïatylli namar ka jingbishni kadei kaba khanglad ïa ka roi ka par.
