Shillong, Naitung 12
Ka Voice of the People Party (VPP) Youth Wing, ha ka miet sngi Saitjain, ka 11tarik Naitung 2026, ka la mih biang ban leh ïa ka jingkhynra kynsan (surprise checking) ha kaba ïadei bad u drok, ha ki jaka ba kharoi bha ha Sor Shillong.
Ka Youth Wing VPP, ka la mih biang ba khynra droks kadei hadien ba ka la ïoh bun ki jingujor bad jingpyntip na ki paidbah, ba kam long kaba shngaiñ shuh ban ïaid ban ïeng, namar ba lah jyllei palat ki nongdih droks bad ki nong saplai droks.
Ka Youth Wing ka la leit ban khynra nyngkong sha ki thaiñ Ajmera lum Survey, PB, Polo, lynti Lawmali bad ter-ter, kine ki jaka ki long kiba jur bha u droks bad ka VPP ka la ïoh bha ki jingujor ha kine ki jaka ba jur u droks.
Ka VPP ka la talasi lut ha ki jaka kyndong ki kynshrot bad beh lut ïa kiba shongkai ha ki kali ha kine ki jaka namar kam long kaba shngaiñ shuh ïa ki paidbah kiba ïaid na kane ka jaka.
“Ngi sngewkhia halor kane ka bynta ba ka jingrung u droks ha ka Jylla ka don ka jingïadei ba jan bha bad ka jingkiew ki jingpang ( HIV/AIDS), ki kam tuh kam thiem, ki jingpra ki ïing ki sem bad ka imlang sahlang bad ki jingjot ka jingim ki khun Samla bad ka jingïap khlem por bad ter-ter,” la ong ka VPP YW.
Ka la ong ruh, ban pynim ïa ka jaitbynriew don kam ban ïada ïa ka bad imat kine ki jingrung u droks, dei ki buit bad pynïap ïa ki Samla, kiba dei ka lawei ka jaitbynriew.
Ha kane ka jingkhynra, ka VPP ka la lap ba ka ktem droks dei ha lum survey ( ka slum ki bar jylla), ha kaba nangne ki saplai ïa u droks ban die kylleng ka sor Shillong.
Kumta na ka liang ka ka VPP, ka dawa ban pynpra noh ïa katei ka jaka mardor bad beh krad noh ïa kine ki briew ba na bar kiba ju mlien ban leh ïa kine ki jait kam.
Ka VPP ka la tip ruh ruh ïa ki kyrteng jong kine ki bar jylla kiba saplai droks bad ka ka seng hi kan nym shongthait, ban rat diengkhong ïa kine ki jingsniew, ban ïai bteng ban khynra bad ban peitngor nangne sha khmat.
