Shillong, Naitung 12
U MDC ka BJP na Tura, u Bernard N. Marak ha ka Sngi U Blei u la kyntu ïa ka Sorkar Jylla ban pyllait noh mardor ïa ka tulop ba sahteng jong ki nongtrei ka Garo Hills Autonomous District Council (GHADC) bad ban buh ruh ïa ka por ban pynkhuid ïa ka jingsiew kaba dang sahkut jong 30 bnai.
Haba kynthoh ïa ka jingpynslem, u Marak u la ong ba kane ka pyni ïa ka “jingbym lah ban burom ïa ki jingkular katkum ka ‘Paragraph’ 3.1 jong ka ‘Tripartite Agreement’.”
“Ha ka jingïakhih jong ki nongtrei ka GHADC, ki nongïalam ba rangbah ki la pyntikna bunsien ba yn pyllait ïa ka tulop ha ka sngi nyngkong jong man la u bnai. Hynrei haduh ka 10 tarik u Naitung, ym pat shym la ïoh pdiang ïa ka tulop,” u la ong.
U la bynrap ruh ba ka ‘arrear’ ka la pynlong ïa ki nongtrei ban mad jingeh ha ka liang ka pisa-tyngka.
“Kane ka jingpynslem ka la pynlong ïa ki nongtrei ban mad jingeh kaba jur ha ka liang ka pisa-tyngka. Bun ki ïakynduh jingeh ha ki EMI, ki ‘Bill’, ki bai skul bad kiwei-kiwei ki jinglut. Bun mynta ki shah kynnoh ba ki dei ki bym siew ram watla kam dei ka jingbakla jong ki,” ong u Marak.
Haba buh jingkylli ïa ka jingthmu jong ka Sorkar, u la ong, “Lada ka Sorkar Jylla ka kut jingmut shisha na ka bynta ka bha ka miat jong ki nongtrei ka GHADC, ka dei ban pyni ïa kata ka jingkut jingmut lyngba ki kam, ha jaka jong ki jingkular kiba na ka por sha ka por. Ka jingbym lah ban pyntreikam kaba ïai bteng ïa ka ‘Paragraph’ 3.1 ka buh ïa ki jingkylli kiba sngewkhia shaphang ka jingshimkhia jong ka.”
Na ka liang u Marak, u la kyrpad ban leh eiei noh mardor haba ïadei bad kane.
“Ka Sorkar ka dei ban pyllait noh mardor ïa ka tulop sahteng ba man u bnai bad ban thaw ïa ka saiñdur kaba buh por ban pynkhuid ïa ki jingsiew ba dang sahkut haduh 30 bnai jong ki ‘arrear’. Ki nongtrei ka GHADC ki la shakri da ka jingaiti lut bad ki dei hok ban ïoh ïa ka jingsiew ha ka por kaba biang, ym ïa ki jingkular ki bym lah pynurlong,” u la ong.
“Ïa ka hok bad ka burom jong ki nongtrei ka GHADC ym lah ban shu iehnoh sah kumto. Ka la dei ka por ïa ka Sorkar Jylla ban pynurlong ïa ki jingkular jong ka bad ban pynïoh biang ïa ka jingshaniah jong ki nongtrei da kaba leh eiei noh khlem da pynslem shuh,” u la bynrap.
